Hayastan parlamentinin sədri Alen Simonyandan maraqlı etiraf
Son bir ay ərzində Azərbaycan və Ermənistan arasında sülh müqaviləsinin bağlanması istiqamətində müxtəlif səviyyələrdə görüşlər keçirilir. Bütün bu danışıqlar, aparılan müzakirələr tərəfləri sülh sazişini imzalamağa bir qədər də yaxınlaşdırır.
Vaşinqtondakı danışıqlar prosesinə nəzər yetirsək görərik ki, hər iki tərəf bəzi məsələlərin həllində razılığa gəliblər. Ancaq yaxın keçmişdə baş tutan görüşlərdən sonra əgər Ermənistanın rəhbərliyi bütün reallıqları etiraf edirsə və çıxış yolunu Azərbaycanla münasibətlərin normallaşmasında görürsə, müxalifət bu prosesi pozmağa cəhd göstərir. Bir tərəfdən sülh müqaviləsinin imzalanmasını qurtuluş yolu hesab edən Ermənistan rəhbərliyi revanşist qüvvələri hələ ki cilovlaya bilmir.
Ermənistan parlamentinin sədri Alen Simonyan bildirib ki, ölkədə parlament müxalifəti mövcud deyil. Sadəcə, parlamentin növbəti çağırışında özlərinə yer tapmaq üçün digər siyasi qüvvələrin sıralarında yer axtaran müəyyən şəxslər var. Onları heç kim dinləmir, küçədə isə yeddi nəfəri belə toplaya bilməzlər.
O, əmin olduğunu vurğulayıb ki, küçədə onun şəkli ətrafında "onlardan" (parlament müxalifəti - red.) daha çox insan toplanacaq: "Onlar siyasi cəsədlərdir, müflislərdir, deyəcək heç nələri yoxdur, onların gündəliyi yoxdur. Əgər sənin yeganə gündəliyin hakimiyyətin gündəliyinin gündəlik olmadığını deməkdən ibarətdirsə, bu, gündəlik deyil. Əgər bizim gündəliyimiz səhvdirsə, bəs, onların gündəliyi nədir? Ermənistanda sülh gündəliyindən başqa bir gündəlik yoxdur".
Simonyanın sözlərinə görə, son dörd il ərzində parlament müxalifəti heç bir dəfə belə növbədənkənar seçkilərin keçirilməsini tələb etməyib. "Görmüsünüzmü ki, guya müxalifət adlanan bu qüvvələr məsuliyyəti üzərinə götürməyə hazır olsunlar? Əvvəl Vazgen Manukyanı gətirdilər, sonra isə Kanadadan vətəndaşlığı olan Bağrat Qalstanyanı". Onun fikrincə, parlamentdənkənar müxalifət mövcuddur. Qarşıdakı seçkilərin nəticəsində bu qüvvələrin böyük bir hissəsi parlamentdə təmsil olunacaq: "Parlamentdən kənarda formalaşmış müxalif siyasi xadimlər var və ümid edirəm ki, onlar parlamentə düşəcəklər və nəhayət, parlamentdə müxalifət olacaq".
Simonyan həmçinin iş adamı Samvel Karapetyan tərəfindən formalaşdırılan siyasi qüvvənin hakimiyyət üçün ciddi rəqib olmadığını bəyan edib: "Orada siyasi qüvvə yoxdur. Bu, sadəcə görüntüdür. Sadəcə varlı bir adam var ki, həbsə düşüb. Onlar parlamentdə siyasi sığınacaq axtarmağa çalışırlar, necə ki, bu onilliklər boyu baş verib".
Hər halda baş verənlər Hayastanı qarşıdakı dövrdə mürəkkəb proseslər gözlədiyini göstərir.
Elçin CƏFƏROV,
"Azərbaycan"
