Sözdə sülhdən danışan ermənilər əməldə başqa mövqe tutduqlarını göstərirlər

Son zamanlar Ermənistan rəhbərliyi sülh sazişini imzalamağa hazır olması barədə çoxsaylı bəyanatlar verməkdə davam edir. Ermənistanın xarici işlər naziri A.Mirzoyan iranlı həmkarı Abbas Əraqçi ilə keçirdiyi brifinqdə yenə iki ölkə arasında imzalanacaq sülh sazişini gündəmə gətirərək qeyd etmişdir: "Uzunmüddətli sülhün təmin edilməsi üçün qarşılıqlı məqbul həllərin tapılması ilə bağlı işi davam etdirmək, danışıqlar aparmaq lazımdır". 

XİN başçısı bildirib: "Bunun alternativi sadəcə yoxdur". O əlavə edib ki, İrəvan Bakı ilə sülh sazişini mümkün qədər tez imzalamağa hazırdır. Ermənistanın baş naziri Nikol Paşinyan başda olmaqla digər erməni rəsmiləri də hər fürsətdə sülh sazişini imzalamağa hazır olduqlarını vurğulayırlar. Onlar sanki sübut etməyə çalışırlar ki, Ermənistan regionda sülhün və sabitliyin tərəfdarı olan ölkədir, Azərbaycan isə sülh sazişini imzalamamaqla regionda sülhə təhlükə yaradır. Amma bu zaman unudurlar ki, iki ölkə arasında  sülh sazişi imzalamaq barədə təkliflə ilk dəfə Azərbaycan tərəfi çıxış edib. Müxtəlif bəhanələrlə beş ildir ki,  sazişi imzalamaqdan yayınan isə Ermənistandır. 

Rəsmi Bakının qəti olaraq tələbi belədir ki, sülh sazişinin imzalanması üçün Ermənistan iki şərti yerinə yetirməlidir: Ermənistan Konstitusiyasındakı Azərbaycanın suverenliyi və ərazi bütövlüyünə qarşı iddiaları aradan qaldırmalı, eləcə də ATƏT-in Minsk qrupunun və aidiyyəti strukturlarının buraxılmasını dəstəkləməlidir. Sülh sazişini imzalamağa hazır olduğunu ifadə edən Ermənistan rəhbərləri nədənsə bu iki məsələnin üstündən sakitliklə keçməyə çalışırlar. 

Görünən budur ki, Ermənistan sülh sazişi bəyanatları ilə manipulyasiya edir. İrəvan özünü "sülhpərvər" göstərməklə ölkəmizə qarşı beynəlxalq təzyiqlər yaratmağı hədəfləyir. Eyni zamanda Ermənistan yaxşı anlayır ki, Bakı bu şərtlər yerinə yetirilməsə, yarımçıq sazişi imzalamayacaq. Və düz də edəcək. Əgər İrəvan gerçəkdən  sülh sazişinin imzalanmasını istəyirsə, nədən  Minsk qrupunun de-yure ləğvi üçün Azərbaycanla birgə ATƏT-ə müraciət etmir? Digər şərt: məlumdur ki, Ermənistan Konstitusiyasında Azərbaycana qarşı ərazi iddialarını özündə əks etdirən maddə var. Əgər Ermənistan gerçəkdən sazişi imzalamağa hazırdırsa, həmin maddənin Konstitusiyadan çıxarılması haqqında təcili referendum keçirərək konkret mövqe nümayiş etdirməlidir. Bunu isə ləngidir. Deməli, işğalçı dövlətin sülh sazişi imzalamaq barədə səsləndirdiyi fikirlər dünya ictimaiyyətini çaşdırmaq üçün düşünülmüş siyasi oyundur. 

Belə olmasaydı, Azərbaycanla Ermənistan arasında sülh sazişi layihəsinin tam razılaşdırılması barədə məlumat yayılandan dərhal sonra İrəvan təxribatlara start verməzdi. Azərbaycan Müdafiə Nazirliyinin məlumatlarına əsasən, Ermənistan şərti sərhəddə Azərbaycan Ordusunun mövqelərini intensiv atəşə tutur. Görünən budur ki, Ermənistanın baş naziri Nikol Paşinyan da xələflərinin yolu ilə getmək istəyir. Bir yandan özünü  beynəlxalq ictimaiyyətə sülh tərəfdarı kimi göstərməyə çalışır, digər tərəfdən də şərti sərhədlərimizdə atəşkəsin  pozulmasını intensivləşdirir.

Məsələ burasındadır ki, şərti sərhədlərimizdə baş verənlər heç də təsadüfi hadisə deyil, koordinasiyalı şəkildə, məqsədli  təşkil olunur. Ermənistan ordusunun təxribatlarından dərhal sonra Aİ müşahidə missiyasının nümayəndələri sərhəd bölgəsində görünürlər. Şübhəsiz ki, sərhədlərimizdə hərbi   təxribatlar törədən Ermənistanın hərbi-siyasi rəhbərliyi və onların beynəlxalq miqyasda havadarları elə zənn edirlər ki, bu faktorlardan sülh sazişinin razılaşdırılması prosesində Azərbaycanı qeyri-konstruktiv tərəf kimi təqdim edib ölkəmizə qarşı təzyiq kimi istifadə edə biləcəklər. Ermənistan rəhbərləri zənn edirlər ki, bununla da beynəlxalq arenada təhlükə altında olduqları görüntüsü yaratmağa nail  olacaqlar. 

Baş verən təxribatların bir səbəbi də Ermənistanın daxilindəki ictimai-siyasi gərginliklə bağlıdır. Son vaxtlar ölkədə revanşist qüvvələrin fəallığı, müxtəlif əhali qruplarının mütəmadi olaraq etiraz aksiyaları keçirmələri, hakimiyyətə qarşı olan qüvvələrin narazılıqlarının artması vəziyyəti daha da gərginləşdirib. Bu səbəbdən Ermənistan hökumətinin bilərəkdən ictimai diqqəti daxili problemlərdən yayındırmaq məqsədi ilə Azərbaycanla sərhəd zonasında təxribatlar törətməsi istisna olunmur.

Sözdə sülh sazişini imzalamağa hazır olduğunu hər addımda təkrarlayan   Ermənistan əgər səmimidirsə, sülhə süni maneə yaradan əməllərindən əl çəkməli, bu prosesdə səmimi iştirak etməli və hərbi təxribatlar yolu ilə danışıqları pozmaq yolunu tutmamalıdır. Davamlı sabitlik və təhlükəsizlik üçün Ermənistan öz siyasətini dəyişməli, regionda sülhün təmin olunmasına töhfə verməli və beynəlxalq öhdəliklərinə əməl etməlidir. 

Elşən QƏNİYEV,

"Azərbaycan"