Misir və Azərbaycan arasında münasibətlərin qədim tarixi var. Bu münasibətlər yalnız rəsmi əməkdaşlıqla məhdudlaşmamış, həm də xalqlar arasında qarşılıqlı tarixi təmaslarda özünü göstərmiş, eləcə də mədəniyyət və elm sahələrini əhatə etmişdir. Bir çox azərbaycanlı Misirə gəlib burada yaşamış və təhsil almış, eləcə də Misirin elmi həyatına töhfələr vermişlər.
AZƏRTAC xəbər verir ki, bu fikirlər Azərbaycanın Misirdəki səfiri Elxan Poluxovun bu ölkənin nüfuzlu “əl-Bavvabə nyuz” qəzetinə müsahibəsində yer alıb.
İkitərəfli əlaqələrin inkişaf dinamikasından söz açan səfir Misir Prezidenti Əbdülfəttah əs-Sisinin 2023-cü ildə Bakıya və Azərbaycan Prezidenti İlham Əliyevin 2024-cü ildə Misirə səfərlərinin ölkələrimiz arasında əməkdaşlıq əlaqələrinin daha da inkişafına təkan verdiyini vurğulayıb.
Diqqətə çatdırılıb ki, iki ölkə arasında siyasi əlaqələr yüksək səviyyədədir. Buna baxmayaraq, mövcud ticarət mübadiləsi ölkələrimizin potensialına cavab vermir. Son rəqəmlərə görə, tərəflər arasında ticarət dövriyyəsinin həcmi təxminən 30 milyon ABŞ dolları təşkil edir. Son illərdə iki ölkə arasında 70-dən çox sənəd imzalanıb. Bu sənədlərin əksəriyyəti iqtisadi-ticarət əlaqələrinin möhkəmləndirilməsi məqsədini güdür.
Eyni zamanda, müsahibədə qeyd olunub ki, yaxın vaxtlarda Qahirədə Azərbaycan Respublikası və Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın 6-cı iclası çərçivəsində biznes-forumun keçirilməsi nəzərdə tutulur. Bu biznes-forum iki ölkə arasında işgüzar əlaqələrin inkişafı üçün əhəmiyyətli xarakter daşıyır.
Mədəniyyət sahəsində əlaqələrə toxunan səfir E.Poluxov qeyd edib ki, Misir Opera Evində bir sıra müştərək tədbirlər təşkil edilib. Belə tədbirlər Azərbaycan mədəniyyətini və musiqisini Misir auditoriyasına tanıtmaq üçün əla fürsət sayılır. Bildirilib ki, bu yaxınlarda azərbaycanlı alimin Misirin məşhur şairi, “Əmir əş-şüara” ləqəbi ilə tanınmış Əhməd Şövqinin yaradıcılığı barədə tədqiqatı ərəb dilində çap edilərək təqdim olunacaq.
Müsahibədə Azərbaycan tarixinin ən şərəfli səhifələrindən biri kimi yaddaşlara yazılmış 44 günlük müharibə nəticəsində torpaqlarımızın azad edilməsi və 2023-cü ilin sentyabrında suverenliyimizin bərpasına gətirib çıxarmış hadisələr barədə də danışılıb. Qeyd olunub ki, Vaşinqton Bəyannaməsi İrəvan və Bakı arasındakı münaqişənin sülh yolu ilə həllinə yönəlmiş səylərin dəstəklənməsi baxımından mühümdür. Ancaq sülh sazişinin imzalanması üçün Ermənistanda konstitusiya dəyişikliyi olmalıdır.
Müsahibədə, həmçinin Yaxın Şərqdə baş verən hadisələrlə bağlı ölkəmizin mövqeyi barədə suallara da cavab verilib.
