Çərşənbə axşamı səhər Əfqanıstanda 1100-dən çox insanın ölümünə və bir neçə min insanın yaralanmasına səbəb olan ölkə tarixində ən güclü zəlzələlərdən birindən sonra xilasetmə əməliyyatı bərpa edilib. Xilasedicilər zəlzələdən ən çox zərər çəkmiş dağlıq ərazilərə çatmağa çalışırlar.
Əfqanıstan Qızıl Aypara Cəmiyyəti bildirib ki, güclü zəlzələ nəticəsində ölənlərin sayı 1124 nəfərə çatıb.
Təşkilatın məlumatına görə, təbii fəlakət nəticəsində ən azı 3251 nəfər xəsarət alıb, 8000-dən çox ev dağılıb.
Xilasetmə qrupları sağ qalanların axtarışını davam etdirir.
BBC xəbər verir ki, bir çox yerli sakin gecəni açıq havada keçirib.
Ölənlərin əksəriyyəti bazar günü axşam saatlarında baş vermiş zəlzələnin episentrinə ən yaxın olan dağlıq Kunar vilayətinin sakinləridir.
Rəsmilər kəndlərin dağılması nəticəsində ölənlərin sayının arta biləcəyi barədə xəbərdarlıq ediblər.
Bu arada Qərb ölkələri zəlzələdən sonra kömək edəcəklərini öhdələrinə götürüblər.
Böyük Britaniya 1 milyon funt-sterlinq vəd edib, eyni zamanda Xarici İşlər Nazirliyi yardımın Əfqanıstanın hakim hökuməti olan “Taliban”ın əlinə keçməsinin qarşısını almaq üçün pulun tərəfdaşlar vasitəsilə yönəldiləcəyini vurğulayıb.
Nazir Devid Lemmi, təcili maliyyələşdirmənin "tərəfdaşlara ən çox təsirlənənlərə əsas tibbi yardım və zəruri ləvazimatlar almasına kömək edəcəyini" bildirib.
Çin, Hindistan və İsveçrə də humanitar yardım göstərməyə söz verib.
Hindistanın xarici işlər naziri Subrahmanyam Cayşankar ölkəsinin Kabilə 1000 çadır təhvil verdiyini və Kunara 15 ton ərzaq daşıdığını, yax;n saatlarda əlavə humanitar yardım gözlənildiyini bildirib.
BMT özünün Fövqəladə Hallara Dəstək Fondu (CERF) vasitəsilə 5 milyon dollar ayırıb.
Rizvan CƏFƏROV,
“Azərbaycan”
