Dünyaşöhrətli aktyor Riçard Gir Bakıda keçiriləcək Ümumdünya Şəhərsalma Forumuna (WUF13) dəstək verib. Hollivud əfsanəsi əsas diqqəti qlobal miqyasda evsiz insanların probleminə yönəldib. Videomesajında əsas insan hüquq və azadlıqlarının məhz mənzildən başladığını qeyd edən aktyor deyib: “Təhlükəsiz ev olmadan sağlamlıq, təhsil, sabit məşğulluq yoxdur”.
WUF13 ərəfəsində dayanıqlı şəhər inkişafı və mənzil məsələlərinə diqqət yetirən BMT-nin “UN-Habitat” agentliyinə görə, dünyada təxminən 3 milyard insanın normal mənzilə çıxışı yoxdur, bu səbəbdən qlobal mənzil böhranı insan hüquqları sahəsində ən təcili problemlərdən birinə çevrilib.
AZƏRTAC BMT-nin məlumatına istinadla xəbər verir ki, Qlobal Cənub və Şimalda bir milyarddan çox insan qeyri-rəsmi yaşayış məntəqələrində yaşayır, 300 milyondan çox insan isə evsiz qalır. Afrikada şəhər yaşayış məntəqələrinin 62 faizi qeyri-rəsmidir. Asiya-Sakit Okean bölgəsində 500 milyondan çox insan əsas su xidmətlərinə çıxış imkanına malik deyil və bir milyarddan çox insan lazımi sanitariya şəraitindən məhrumdur.
Evsizlik sığınacağın olmamasından daha geniş yayılır. Bu, tez-tez təhlükəsizlik, səhiyyə, şəxsi həyat və insan ləyaqəti də daxil olmaqla fundamental hüquqların inkarına səbəb olur.
“UN-Habitat” qeyd edir ki, bu məsələ Azərbaycanın paytaxtı Bakıda keçiriləcək BMT-nin davamlı urbanizasiya üzrə aparıcı qlobal konfransı olan Ümumdünya Şəhərsalma Forumunun (WUF13) on üçüncü Sessiyasında müzakirə olunacaq.
“Dünya üçün mənzil: Təhlükəsiz və dayanıqlı şəhərlər və icmalar” mövzusunda keçirilən konfransda hökumətlər, vətəndaş cəmiyyəti, şəhərsalma mütəxəssisləri, özəl sektor liderləri və gənclərin nümayəndələri artan mənzil böhranının həll yollarını müzakirə etmək üçün bir araya gələcəklər.
Riçard Gir Fondu mənzil məsələlərinə diqqət yetirən İspaniya təşkilatı olan “HOGAR SÍ” və “UN-Habitat” ilə birlikdə bütün insanların adekvat mənzilə çıxışının təmin edilməsinə diqqət yetirmək üçün müzakirələri dəstəkləyir.
Tərəfdarların fikrincə, evsizlik cəmiyyətin vətəndaşlarını təmin edə bilməməsi səbəbindən yaranır və böhranın həlli uzunmüddətli siyasi öhdəlik, daha güclü sosial müdafiə sistemləri, habelə mənzil mərkəzli dövlət siyasəti tələb edəcək.
Riçard Gir bildirib: “Evsizlik qaçılmaz deyil. Bu, dərin, ləyaqəti, yaşamaq hüququnu pozan, amma həll edə biləcəyimiz bir ədalətsizlikdir”.
“UN-Habitat”ın icraçı direktoru Anaklaudiya Rossbax bildirib ki, bu əməkdaşlıq şəhər problemləri ilə mübarizədə qlobal əməkdaşlığa ehtiyac olduğunu vurğulayır.
