Fevralın 3-də Milli Məclisin Əmək və sosial siyasət komitəsinin videokonfrans formatında iclası keçirilib.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, komitənin sədri Musa Quliyev iclasda üç qanun layihəsinin müzakirə olunacağını söyləyib.
Gündəliyin birinci məsələsini – Əmək Məcəlləsində, “Dövlət sosial sığorta sistemində fərdi uçot haqqında” və “Əmək pensiyaları haqqında” qanunlarda dəyişiklik edilməsi barədə qanun layihəsini birinci oxunuşda təqdim edən komitə sədri bildirib ki, dövlət sosial sığorta sistemində elektron xidmətlərə keçidin sürətləndirilməsi və innovativ həllərin tətbiqi mütəmadi olaraq bu sistemlə bağlı dəyişikliklərin aparılmasını və təkmilləşdirilmələrin həyata keçirilməsini zəruri edir. Sosial sığorta nömrəsi (SSN) verilərkən bu, elektron sistemlərdə həmin şəxsin şəxsiyyət vəsiqəsinin fərdi identifikasiya nömrəsi (FİN) ilə əlaqələndirilir. Qeyd olunub ki, hazırda sığortaedənlər tərəfindən muzdlu işlə əlaqədar vahid rüblük bəyannamə təqdim edilərkən SSN və FİN məlumatların hər ikisinin daxil edilməsi əlavə iş yükü yaradır və sistemdə məlumat bazasının yüklənməsinə səbəb olur.
Diqqətə çatdırılıb ki, qanun layihəsində sığortaolunanların sığortaçıda uçotunun yalnız FİN ilə aparılması təklif edilir. Bu dəyişiklik sosial sığorta sistemində məlumatların idarə olunmasında vahidliyi və uyğunluğu təmin edəcək, habelə qurumlar arasında məlumat mübadiləsini asanlaşdıraraq e-sistemlərin inteqrasiyasını sürətləndirəcək.
Sonra Musa Quliyev növbəti məsələ – birinci oxunuşda olan Mülki Prosessual Məcəllədə, Ailə Məcəlləsində, Cinayət-Prosessual Məcəllədə, “Gənclər siyasəti haqqında”, “Uşaq hüquqlarının müdafiəsi üzrə komissiyalar haqqında Əsasnamənin təsdiq edilməsi barədə”, “Yetkinlik yaşına çatmayanların baxımsızlığının və hüquq pozuntularının profilaktikası haqqında”, “Bədən tərbiyəsi və idman haqqında”, “Sosial xidmət haqqında”, “Reklam haqqında”, “Tütün məmulatlarının istifadəsinin məhdudlaşdırılması haqqında”, “Uşaqların zərərli informasiyadan qorunması haqqında” və “Media haqqında” qanunlarda dəyişiklik edilməsi barədə qanun layihəsinə dair məlumat verib.
Komitə sədri təqdim olunan sənəddə “Uşaq hüquqları haqqında” qanun layihəsindən irəli gələrək, uşaqların hüquq və azadlıqlarının təmin edilməsi, uşaq hüquqlarının təminatının hüquqi əsaslarının formalaşdırılması məqsədilə bir sıra qanunvericilik aktlarında müvafiq dəyişikliklərin nəzərdə tutulduğunu qeyd edib.
Bildirilib ki, layihədə adı çəkilən “Sosial xidmət haqqında” Qanuna çətin həyat şəraitində olan uşaqların aşkarlanması ilə bağlı yeni 10-1-ci maddənin əlavə edilməsi təklif olunur. Dəyişikliyə əsasən, çətin həyat şəraitində olan uşaqların aşkarlanması bu Qanunun 7.1.1-ci maddəsində qeyd edilən əsaslar üzrə Ailə Məcəlləsinə uyğun olaraq müvafiq icra hakimiyyəti orqanının müəyyən etdiyi orqan, bu Qanunun 7.1.2–7.1.8-ci və 7.1.10-cu maddələrində qeyd edilən əsaslar üzrə “Uşaq hüquqları haqqında” Qanuna uyğun olaraq uşaq hüquqlarının müdafiəsi üzrə yerli komissiya tərəfindən həyata keçirilir.
Sənəddə bir sıra digər dəyişikliklər, o cümlədən uyğunlaşdırma xarakterli düzəlişlər də nəzərdə tutulub.
Onlayn iclasda, həmçinin Əmək Məcəlləsində dəyişiklik edilməsi haqqında qanun layihəsi ikinci oxunuşda nəzərdən keçirilib. Komitə sədri bildirib ki, Məcəlləyə təklif olunan dəyişiklik minimum əmək haqqının müəyyənləşməsinin dövriliyinin təmin edilməsi ilə bağlıdır.
Təqdim olunan məsələlər ətrafında müzakirələrdə çıxış edənlər öz fikirlərini açıqlayıblar, bəzi qeyd və təkliflərini səsləndiriblər.
Müzakirələrin yekununda qanun layihələrinin hamısı Milli Məclisin plenar iclasına tövsiyə olunub.
jpg_1770119627.jpg)
