COP30-un prezidenti Andre Korrea do Laqo dünya xalqlarını Braziliyanın Belem şəhərində keçiriləcək konfransı daha ədalətli və dayanıqlı gələcəyə keçid mərasimi kimi dəyərləndirməyə çağırıb.
AZƏRTAC xəbər verir ki, bu barədə COP30-un rəsmi səhifəsində məlumat verilib.
Beynəlxalq ictimaiyyətə ünvanladığı beşinci məktubunda Andre Korrea do Laqo vurğulayıb ki, insanlar iqlim dəyişikliyinin yalnız qurbanları deyil, həm də onun təsirlərinə qarşı mübarizənin liderləridir. “Biz beynəlxalq ictimaiyyəti COP30-u daha ümidverici və firavan gələcəyə keçidimizi qeyd etmək və ayıq şəkildə bayram etmək üçün bir mərasimə çevirməyə dəvət edirik. COP30-dan istifadə edərək keçmişdə firavanlıq vəd edən, lakin artıq gələcəyə ümid gətirməyən inkişaf modelinə görə kollektiv olaraq kədərimizi ifadə edə bilərik”, – deyə o bildirib.
BMT-nin əsas prinsiplərindən ilhamlandığını bildirən Andre Korrea do Laqo məktubunda insanların həyat təcrübələri, fəallığı, mədəniyyəti və liderliyinin təbiətlə daha ahəngdar münasibət üçün nümunə olduğunu vurğulayıb. Onun sözlərinə görə, COP30 tarixi olaraq kənarda qalmış, yerindən edilmiş və səsi eşidilməmiş insanları qlobal iqlim dəyişikliyinə qarşı mübarizənin əsas iştirakçıları və hüquq daşıyıcıları kimi tanıyan dönüş nöqtəsi olmalıdır.
Andre Korrea do Laqo qeyd edib ki, Braziliyanın Prezidentinin təşəbbüsü çərçivəsində konfransın bütün istiqamətləri üzrə konkret fəaliyyət və ölçülə bilən nəticələrlə insanları COP30-un mərkəzinə qoyacaq. Səfərbərlik istiqamətində isə Xüsusi Nümayəndələr, COP30-un gənc iqlim çempionu və Yerli Xalqların nümayəndələri vasitəsilə insanların reallıqları ilə birbaşa əlaqə yaradılıb.
Onun sözlərinə görə, danışıqlarda insanlar Qlobal Uyğunlaşma Məqsədi, Ədalətli Keçid İş Proqramı, yeni Gender Fəaliyyət Planı, Yerli İcma və Yerli Xalqlar Platforması, eləcə də itki və zərərin ödənilməsi kimi məsələlərin mərkəzində yer alır. Liderlər Sammitində isə dövlət başçıları iqlim rejimini insanların gündəlik həyatı ilə əlaqələndirən konkret həll yolları axtarışına yönəlmiş müzakirələr aparacaqlar.
Andre Korrea do Laqo vurğulayıb ki, çoxtərəfliliyi gücləndirmək və qlobal öhdəliklərin icrasını sürətləndirmək üçün insanlar hər bir Milli Səviyyədə Müəyyən Edilmiş Töhfələrin (NDC), Milli Uyğunlaşma Planının (NAP) və İkiillik Şəffaflıq Hesabatların (BTR) mərkəzində olmalıdır. Onlar iqlim maliyyəsi, ticarət və dayanıqlı enerjiyə keçid kimi mühüm sahələrdə qərarların formalaşmasında iştirak etməlidirlər.
“Zərərin azaldılması, uyğunlaşma, maliyyələşmə, texnologiya və potensialın artırılması ilk növbədə struktur bərabərsizliklərin aradan qaldırılması, aclığın bitməsi və yoxsulluğun ləğvi, eyni zamanda dayanıqlı inkişafın, insan hüquqlarının, eləcə də gender və irq bərabərliyinin təşviqidir. İndi xatırlamağın vaxtıdır ki, iqlim ədaləti insanlardan başlayır”, – deyə COP30-un prezidenti qeyd edib.
