COP29-un İqlim üzrə gənclər çempionu Leyla Həsənova London İqlim Həftəsi çərçivəsində baş tutmuş “Commonwealth” Katibliyinin təşkilatçılığı ilə keçirilmiş “İqlim Maliyyəsinə Əlçatanlığın Sürətləndirilməsi: Dayanıqlı və Əhatəli bir-birinə bağlı bir Commonwealth üçün” mövzusunda dəyirmi masada iştirak edib.
AZƏRTAC xəbər verir ki, tədbir “Commonwealth” İqlim Maliyyəsinə Əlçatanlıq Mərkəzinin (CCFAH) 10 illiyi münasibətilə təşkil olunub.
Tədbirdə əsas diqqət iqlimə qarşı həssas olan ölkələrin, xüsusilə Kiçik Ada İnkişaf etməkdə olan Dövlətlər (SIDS), qlobal iqlim maliyyəsindən daha effektiv şəkildə faydalanmasına yönəlib.
Ümumdünya Meteorologiya Təşkilatının məlumatına görə, 1970–2021-ci illər ərzində SIDS və digər iqlimə qarşı həssas ölkələr ümumilikdə 4,3 trilyon ABŞ dolları həcmində iqtisadi itki ilə üzləşiblər. Halbuki bu ölkələrin əldə edə bildiyi iqlim maliyyəsi kifayət qədər deyil – 2019-cu ildə SIDS cəmi 1,5 milyard ABŞ dolları həcmində iqlim maliyyəsi əldə edib.
COP29-da verilən yeni öhdəliyə əsasən, inkişaf etmiş ölkələrdən inkişaf etməkdə olanlara illik 300 milyard ABŞ dolları həcmində iqlim maliyyəsinin ayrılması və 2035-ci ilə qədər ümumilikdə 1,3 trilyon ABŞ dolları məbləğində ictimai və özəl vəsaitin səfərbər olunması nəzərdə tutulur.
CCFAH, 2015-ci ildə keçirilmiş Commonwealth Hökumət Başçılarının Zirvə Görüşünün qərarı ilə təsis olunub və 2016-cı ildən fəaliyyət göstərir. Bu təşəbbüs, üzv ölkələrin beynəlxalq iqlim maliyyəsinə çıxışda üzləşdikləri çətinlikləri aradan qaldırmağa yardım edir. 2025-ci ilin aprel ayına olan məlumata görə, CCFAH 21 ölkə və Afrika və Karib hövzəsi üzrə 104 layihəyə (43 adaptasiya, 12 mitigasiya, 49 isə hər iki istiqamət üzrə) ümumilikdə 485,68 milyon ABŞ dolları həcmində iqlim maliyyəsinin cəlb olunmasına dəstək verib. Eyni zamanda, mərkəz 3430-dan çox dövlət nümayəndəsini əhatə edən 152 tutumartırıcı tədbir keçirib.
Leyla Həsənova bildirib ki, CCFAH-nın 10 illiyi münasibətilə təşkil olunmuş bu mühüm tədbirdə təkcə keçmiş nailiyyətlərimizi qeyd etmək üçün deyil, eyni zamanda gələcək fəaliyyətlərimiz üçün yeni istiqamətlər müəyyənləşdirmək baxımından da vacib fürsətdir.
Tədbirin məqsədləri çoxşaxəlidir və hər biri Commonwealth ailəsi üçün aktual və strateji əhəmiyyət daşıyır: İrəliləyiş və Təsirin Qeyd Olunması – CCFAH-nın son on ildə iqlim maliyyəsinə çıxışın asanlaşdırılması sahəsində əldə etdiyi nəticələri, xüsusilə adaptasiya və mitigasiya sahələrindəki uğurları bölüşmək üçün bu platforma əhəmiyyətlidir. Həmçinin Strateji Tərəfdaşlıqların Dərinləşdirilməsi – Donor qurumlarla, beynəlxalq maliyyə institutları və özəl sektorla əməkdaşlığımızı daha da gücləndirmək, maliyyə axınlarının koordinasiyasını təmin etmək əsas prioritetlərimizdəndir. Bilgi Mübadiləsi və Gələcəyə Baxış – Üzv ölkələr arasında təcrübə və biliklərin paylaşılması, yeni maliyyələşdirmə modellərinin və alətlərinin müzakirəsi, qarşılıqlı öyrənmənin gücləndirilməsi məqsədimizdir. Təbliğat və Görünürlüyün Artırılması – CCFAH-nın fəaliyyəti və üzv ölkələrdə yaradılmış real təsirlər, lokal uğurlar vasitəsilə daha geniş şəkildə təqdim olunmalı və diqqət mərkəzinə çəkilməlidir. Maliyyələşdirici Tərəflərlə Uğurlu Uyğunlaşma – Donorların tematik maraqları, risk yanaşmaları və maliyyələşdirmə prinsiplərinin CCFAH-nın layihə portfeli ilə uyğunlaşdırılması, daha səmərəli əməkdaşlıq üçün vacibdir. Əməkdaşlıq Şəbəkələrinin Gücləndirilməsi – Ənənəvi və innovativ maliyyə mənbələrinin səfərbər edilməsi üçün üzv ölkələr və maliyyə qurumları arasında etimada əsaslanan əlaqələrin qurulması zəruridir.
Leyla Həsənova qeyd edib ki, bu platforma həmrəylik və qarşılıqlı öhdəlik ruhunda əməkdaşlığımızı daha da dərinləşdirməyə imkan yaradacaq.
Tədbir “Commonwealth” ölkələri arasında iqlim maliyyəsi sahəsində əməkdaşlığın və bilik mübadiləsinin yeni mərhələyə keçidini təşviq edən mühüm platforma kimi qiymətləndirilir.
jpeg_1765955251.jpeg)
