İqlim dəyişmələri artıq qeyri-sabitlik və miqrasiya proseslərinə təsir göstərir. Əgər qlobal hərəkətliliyi artırmasaq, bu əlaqə daha da dərinləşəcək. Buna görə biz Bakıda 130-dan çox ölkənin dəstəklədiyi COP29 Bakı Sülh, Yardım və Bərpa üçün İqlim Fəaliyyəti Çağırışı irəli sürdük. Bu təşəbbüs iqlim və münaqişə arasında qarşılıqlı təsiri qabardaraq ən həssas insanların müdafiəsinə yönəlib.
AZƏRTAC xəbər verir ki, bu barədə Azərbaycan Prezidentinin iqlim məsələləri üzrə nümayəndəsi, COP29 sədri Muxtar Babayev Paris Sülh Forumu çərçivəsində çıxışında bildirib. Muxtar Babayev iqlim və sülhün təşviqi sahəsində qlobal əməkdaşlığın gücləndirilməsinin vacibliyini də vurğulayıb.
COP29 Sədri qeyd edib ki, Paris Sazişinin ilk onilliyində dünya ölkələri iqlim böhranına qarşı kollektiv cavab mexanizmini formalaşdırıblar: “Bakıdakı COP29-da biz nəhayət Paris Qaydalar Kitabını tamamladıq və iqlim fəaliyyətinin növbəti onilliyi üçün icra mexanizmlərini təsdiqlədik. Bu, ölkələrin hələ də razılığa gələ bildiyini və çoxtərəfli diplomatiyanın işlədiyini sübut etdi”.
Muxtar Babayev iqlim prosesinə inamın bərpasının növbəti mərhələdə əsas hədəf olduğunu bildirib: “Builki görüşlərimizdə açıq şəkildə gördük ki, tərəflər arasında etimad çatışmazlığı var. Biz bu etimadı bərpa etməliyik. Bunun açarı şəffaflıq və maliyyədir”.
Onun sözlərinə görə, Bakı Şəffaflıq Platforması ölkələrin milli iqlim planlarını hazırlamasına dəstək məqsədilə yaradılıb və artıq 100-dən çox ölkə bu planlarını BMT-yə təqdim edib. COP29 sədri maliyyə məsələsinə də toxunub: “İnkişaf etməkdə olan ölkələrə vəd olunan dəstəyin təmin olunması vacibdir. Biz Qlazqoda verdiyimiz sözə uyğun olaraq, bu ilin sonuna qədər adaptasiya maliyyəsini ikiqat, 2030-cu ilə qədər isə BMT İqlim Fondlarının vəsait axınını üçqat artırmalıyıq. Donorlar isə Bakıda vəd etdikləri 300 milyard dollarlıq öhdəliyin ədalətli payını necə yerinə yetirəcəklərini açıqlamalıdırlar”.
COP prosesinin iqlim böhranına cavab vermək üçün ən legitim platforma olduğunu diqqətə çatdıran M.Babayev bildirib: “Qarşıda duran vəzifəmiz aydındır - biz qurduğumuzu qoruyub saxlamalı, şəffaf əməkdaşlıq etməli və nəticələr vasitəsilə etimadı gücləndirməliyik. COP30-da Belenlə başlayan yeni mərhələdə iqlim diplomatiyasının gücünü birlikdə artıracağıq”.
