Azərbaycanın Mərkəzi Asiya, Xəzər regionu, Türkiyə və Avropa arasında əlaqələndirici ölkə kimi rolu getdikcə güclənir. Britaniyalı jurnalist və ekspert Neil Vatson bu fikirdədir.
O, AZƏRTAC-a açıqlamasında Prezident İlham Əliyevin Qırğızıstana səfərini Avrasiyada baş verən daha geniş strateji dəyişikliklərin bir hissəsi kimi qiymətləndirib.
“Azərbaycan getdikcə özünü yalnız Cənubi Qafqaz dövləti kimi deyil, Mərkəzi Asiya, Xəzər regionu, Türkiyə və Avropa arasında əlaqələndirici güc kimi mövqeləndirir”, – deyə ekspert bildirib.
Neil Vatsonun sözlərinə görə, Azərbaycanın Şanxay Əməkdaşlıq Təşkilatının (ŞƏT) Sammitində yüksək siyasi səviyyədə iştirakı Bakıya Avrasiyanın mühüm platformalarından birində təmsil olunmaq imkanı yaradır.
Ekspert qeyd edib ki, rəsmi Bakı Türkiyə və Mərkəzi Asiya ilə yaxın münasibətlər saxlayır, Çinlə getdikcə daha mühüm tərəfdaşlıq qurur, Avropa ilə strateji enerji və iqtisadi əlaqələrə, Rusiya və digər Avrasiya gücləri ilə isə işgüzar münasibətlərə malikdir. Onun sözlərinə görə, Azərbaycanın ŞƏT-lə əməkdaşlığı ölkənin digər istiqamətlərdəki tərəfdaşlıqlarını əvəz etmir, əksinə, onları tamamlayır.
Neil Vatson, həmçinin ŞƏT-in Bişkek Sammiti çərçivəsində Prezident İlham Əliyevin regional liderlərlə keçirdiyi görüşlərə toxunub. O, Qazaxıstan Prezidenti ilə görüşü qeyd edib, həmçinin Prezident İlham Əliyevin Ermənistanın Baş naziri Nikol Paşinyanla görüşündə ötən ilin avqustunda Vaşinqtonda əldə edilmiş razılaşmalardan sonra Ermənistanla praktiki ticarət və tranzit əlaqələrinin formalaşması məsələlərinin müzakirə olunduğunu bildirib.
“Bu mənada Azərbaycan getdikcə geosiyasi sərhəd deyil, geosiyasi körpü kimi çıxış edir. Bu, olduqca mühüm fərqdir. Daha parçalanmış və çoxqütblü hala gələn beynəlxalq sistemdə bir neçə güc mərkəzi ilə funksional münasibətlər saxlaya bilən ölkələr daha böyük strateji əhəmiyyət qazanırlar”, – deyə britaniyalı ekspert vurğulayıb.
Neil Vatson Azərbaycanın Mərkəzi Asiya üçün əhəmiyyətinə də diqqət çəkib. Onun sözlərinə görə, Mərkəzi Asiya dövlətləri beynəlxalq bazarlara çıxış imkanlarını şaxələndirməkdə maraqlıdırlar.
“Azərbaycan Xəzər regionundan Gürcüstan, Türkiyə və Avropaya doğru ən qısa praktik qərb bağlantısını təmin edir”, – deyə ekspert qeyd edib.
Britaniyalı jurnalist Azərbaycanın Orta Dəhlizdə mühüm mövqeyə malik olduğunu da bildirib. Onun sözlərinə görə, Çin və Mərkəzi Asiyadan gələn yüklər Qazaxıstan və digər Mərkəzi Asiya dövlətlərindən keçərək Xəzər dənizi vasitəsilə Azərbaycana, buradan isə Gürcüstan üzərindən Türkiyə və Avropa bazarlarına, yaxud Qara dəniz bağlantıları vasitəsilə Avropaya daşınır.
“Azərbaycan sadəcə bu marşrut üzərində yerləşən ölkə deyil. Məhz Azərbaycan Mərkəzi Asiyadan gələn quru nəqliyyatının Trans-Xəzər, daha sonra isə Avropa nəqliyyat sisteminə qoşulduğu əsas bağlantı nöqtəsidir”, – deyə Neil Vatson bildirib.
