BMT hər il avqustun 12-də qeyd edilən Beynəlxalq Gənclər Günü münasibətilə müraciət yayıb.
AZƏRTAC təşkilatın məlumatına istinadla xəbər verir ki, “Gənclər dayanıqlı inkişafın aparıcı qüvvəsidir” sərlövhəli müraciətin mətnində dünya əhalisinin yarıdan çoxunun 30 yaşdan kiçik insanlar olduğu və gənclərin iqlim fəaliyyətindən bərabərliyə qədər olan məsələlərdə əsas səylərə rəhbərlik etdiyi vurğulanır. BMT bu kontekstdə gənclərin öz icmalarını və daha geniş dünyanı dəyişdirmək gücünü vurğulayır.
Müraciətdə qeyd olunur: “Hər il avqustun 12-də qeyd olunan bu əlamətdar gün hər yerdə gənclərin hüquqlarına, töhfələrinə və problemlərinə diqqət çəkir. Builki “Dayanıqlı İnkişaf Məqsədləri (SDG) və ondan kənarda yerli gənclərin fəaliyyəti” mövzusu həmin məqsədlərə nail olmaq və daha ədalətli, inklüziv cəmiyyətlərin formalaşdırılması üçün gənclərin cəlb edilməsinin necə vacib olduğunu vurğulayır”.
Təşkilatın Baş katibi Antonio Quterreş bu əlamətdar gün münasibətilə müraciətində qeyd edir: “Gənclər cəsarətli yenilikçilər, davamlı təşkilatçılar və Dayanıqlı İnkişaf Məqsədlərinə nail olmaq üçün vacib tərəfdaşlardır. Onlar davamlı inkişafa təkan verir, daha inklüziv icmalar qurur, sülhü möhkəmləndirir və ədalətli, yaşıl və təhlükəsiz gələcək tələb edirlər. Hər bir gəncin səsi, ideyaları və liderliyi bizim üçün vacibdir. Gəlin gənclərin rəhbərlik etdiyi həlləri dəstəkləmək və daha ədalətli, dinc və davamlı dünya qurmaq üçün birlikdə çalışaq”.
BMT-nin məlumatlarına görə, dünya əhalisinin yarısını 30 və ya daha gənc yaşda olanlar təşkil edir. 2030-cu ilə qədər bu rəqəmin 57 faizə yüksələcəyi gözlənilir. Bu gün 25 yaşdan aşağı olanlar 2050-ci ilə qədər qlobal əsas yaşlı işçi qüvvəsinin 90 faizindən çoxunu təşkil edəcəklər. Bundan əlavə, 26 ölkədə insanların ictimai həyatda üzləşdiyi çətinliklərlə bağlı 27 mindən çox respondent arasında keçirilən beynəlxalq sorğu göstərib ki, gənclərin 67 faizi daha yaxşı gələcəyə inanır, 15-17 yaşlı gənclər isə daha çox nikbinlik ifadə edirlər.
Təşkilat qeyd edir ki, bununla belə, gənclər sistemli problemlərlə üzləşməkdə davam edirlər. Onların arasında işsizliyin səviyyəsi son 15 ildə ən aşağı səviyyədə olsa da, qlobal miqyasda hələ də 13 faizə çatır. Bununla yanaşı, 10-19 yaşlı gənclər arasında hər yeddi nəfərdən biri psixi sağlamlıq pozuntusu yaşayır. Aşağı və orta gəlirli ölkələrdə 10 yaşlı uşaqdan təxminən altısı sadə bir abzası oxuyub başa düşə bilmir.
2025-ci il Beynəlxalq Gənclər Günü təkcə bu məsələlərin aktuallığını deyil, həm də gənclərin özləri tərəfindən – icmalarında, şəhərlərində və ölkələrində həll yollarını vurğulamaq məqsədi daşıyır. A.Quterreşin vurğuladığı kimi, “qlobal tərəqqi icmalardan başlayır və dünyanın hər yerində gənclər liderliyi ələ alırlar”.
Beynəlxalq Gənclər Günü ilk dəfə 1995-ci ildə qəbul edilmiş Gənclər üçün Ümumdünya Fəaliyyət Proqramına əsaslanaraq, 1999-cu ildə BMT Baş Assambleyası tərəfindən elan olunub.
