Bələdiyyə seçkilərinə hazırlığın vəziyyəti ilə tanış olmaq üçün 65 saylı Salyan-Biləsuvar-Neftçala Seçki Dairəsinin 13 saylı məntəqəsində olduq. Məntəqə Salyan şəhər Y.Qasımov adına 4 saylı tam orta məktəbin binasında yerləşir.
Məntəqənin yerləşdiyi idman zalına daxil oluruq. Burada seçkilərlə bağlı bütün işlər görülmüşdür. Foyedəki lövhələrdə seçici siyahıları asılmış, idman zalının bir tərəfində 12 kabinə, seçicilərin bülletenləri atacaqları 2 daşınmaz və 1 daşınan qutu, dövlət atributlarımız olan bayrağımız, gerbimiz qoyulmuşdur. Masanın üstündə isə seçkilər haqqında qanun və təlimatlar vardır. Seçkinin gedişini izləyəcək müşahidəçilər üçün də xüsusi yer ayrılmışdır.
Məntəqə sədri Rəşad Zərbəliyev: "Bu günlər seçkiyə hazırlığın mühüm mərhələsidir. Çalışırıq ki, hər bir seçici seçki günü məntəqəyə gəlib səs versin. Artıq bildirişləri paylamağa başlamışıq. Məntəqənin hər bir üzvü bölgüyə əsasən ona həvalə olunmuş ərazidə evlərə baş çəkir, bildirişləri seçicilərə çatdırır".
65 saylı Salyan-Biləsuvar-Neftçala dairəsi üzrə 5-i Salyanda, 1-i Biləsuvarda, 1-i Neftçalada olmaqla 7 bələdiyyəyə seçkilər keçiriləcək. Bunun üçün Salyanda 38, Biləsuvarda və Neftçalanın hər birində 6 məntəqə yaradılıb. Cəmi 50 məntəqə üzrə 52 min 665 seçici siyahıya alınmışdır ki, onun da 39 min 394 nəfəri Salyan, 7 min 477 nəfəri Biləsuvar, 5 min 794 nəfəri Neftçala sakinləridir. Bələdiyyə üzvlüyünə namizəd olan 159 nəfərin 81-i Yeni Azərbaycan Partiyası, 1 nəfəri Vətəndaş Həmrəyliyi Partiyasının üzvləridir. 77 nəfər isə öz təşəbbüsləri ilə namizədliklərini irəli sürmüşlər. Dairə üzrə 206 gənc ilk dəfə səs verəcək. Seçicilərin 831 nəfəri isə 80-100 yaş arasındadır.
Seçkilərin demokratik, ədalətli və şəffaf keçirilməsinə nəzarət üçün dairə üzrə Salyanda 441, Biləsuvarda 60, Neftçalada 83 müşahidəçi qeydiyyatdan keçmişdir.
S.CAVADOV,
"Azərbaycan"
