Qadınların iqlim fəaliyyətində liderliyinin və iştirak imkanlarının artırılması Azərbaycan üçün prioritet istiqamətlərdən biridir.
Bu barədə AZƏRTAC-a müsahibəsində Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib.
O deyib ki, Azərbaycanda qadınların iqlim fəaliyyətində iştirakını gücləndirmək üçün konkret addımlar atılır: “Əvvəllər bu sahəyə ictimaiyyətin diqqəti kifayət qədər cəlb olunmamışdı və qadınların iqlim fəaliyyətində rolu barədə məlumatları məhdud idi. Lakin son illərdə komitələrin, panel və fəaliyyət qruplarının tərkibində qadınların iştirakı artıb. Bu da göstərir ki, Azərbaycan qadınların iqlim fəaliyyətinə aktiv cəlb olunması istiqamətində mühüm addımlar atıb və gələcəkdə də bu proses davam etdirilməlidir”.
Komitə sədri vurğulayıb ki, qadınların liderliyi yalnız panel çıxışları və təşkilatçılıq fəaliyyəti ilə məhdudlaşmır. Qadınlar, həmçinin digər qadınların marağını artırır, onları bu proseslərdə iştirak etməyə və qərar qəbuletmədə aktiv rol almağa təşviq edirlər:”İqlim dəyişikliyinin təsirlərindən ən çox zərər çəkənlər qadınlar və uşaqlardır. Qadınlar ailədən başlayaraq, ev və məişət məsələlərində, uşaqların tərbiyəsində iqlimlə bağlı düzgün davranış və maarifləndirmə işini həyata keçirirlər. Məsələn, su və enerji istifadəsi, qida israfının qarşısının alınması kimi məsələlərdə qadınların bilik və təşəbbüsləri cəmiyyətin daha geniş hissəsinə təsir göstərir. Əgər bu iş evlərdən başlayarsa, ümumilikdə ətraf mühiti və dünyanı qorumaq daha səmərəli olar”.
Bahar Muradova əlavə edib ki, qadınların iqlim siyasəti və qərar qəbuletmə prosesində iştirakını artırmaq, onları fəaliyyət qruplarında, panel çıxışlarında və lider mövqelərdə görmək Azərbaycanın davamlı inkişaf strategiyasının ayrılmaz hissəsidir. Qadınların bu prosesdə iştirakının artırılması həm də gender bərabərliyinin möhkəmlənməsinə xidmət edir və onların liderliyini gücləndirir. “Azərbaycan qadınların iqlim fəaliyyətində daha yaxından iştirakını təmin etmək üçün geniş maarifləndirmə və təlim proqramları həyata keçirir. Biz qadınların yalnız iştirakçı deyil, həm də qərar qəbul edən, lider və təşkilatçı olmalarını təmin etməliyik. Bu isə qadınların öz təşəbbüsü və iştirak səylərindən də çox asılıdır”, - deyə komitə sədri diqqətə çatdırıb.
jpg_1763916860.jpg)
jpg_1763620972.jpg)
