Azərbaycanın yüksək nüfuzunun göstəricisi

Azərbaycan və ABŞ arasında münasibətlər yeni mərhələyə daxil olaraq strateji əhəmiyyət daşımağa başlayıb. Bu münasibətlər qarşılıqlı maraqlara əsaslanan əməkdaşlığa və liderlər arasında formalaşmış siyasi etimada əsaslanır. 

Donald Trampın ABŞ prezidenti seçilməsindən sonra ölkələrimiz arasında münasibətləriin yeni inkişaf mərhələsinə qədəm qoyduğunu deyən Milli Məclisin deputatı Vüqar Rəhimzadə qeyd edib ki, ötən ilin avqust ayında Prezident İlham Əliyevin ABŞ-yə səfəri Azərbaycan-Amerika münasibətlərinin inkişafı baxımından xüsusi əhəmiyyət kəsb edib.  İki ölkə arasında münasibətlər təkcə ənənəvi diplomatik əməkdaşlıq çərçivəsində inkişaf etməklə kifayətlənməyərək, keyfiyyətcə yeni - strateji tərəfdaşlıq səviyyəsinə yüksəlib. Fevralın 10-da Bakıda Prezident İlham Əliyev və ABŞ-nin vitse-prezidenti Ceyms Devid Vens tərəfindən hər iki ölkənin hökumətləri arasında Strateji Tərəfdaşlıq haqqında Xartiyanın imzalanması bunun təsdiqidir. "Son illərdə ABŞ siyasi dairələrində Azərbaycan və Prezident İlham Əliyev haqqında səslənən yüksək fikirlər təsadüfi deyil. Bu, Prezident İlham Əliyevin liderliyi ilə həyata keçirilən uğurlu siyasət nəticəsində Azərbaycanın artan geosiyasi çəkisi, enerji təhlükəsizliyində oynadığı rol və regional sabitliyə verdiyi töhfə ilə birbaşa bağlıdır. Vaşinqton üçün Cənubi Qafqaz strateji əhəmiyyət daşıyan bölgədir və bu regionda Azərbaycan kimi etibarlı tərəfdaş faktorunun mövcudluğu xüsusi önəm kəsb edir", - deyə o bildirib.

Deputat vurğulayıb ki, Prezident İlham Əliyevin rəhbərliyi ilə həyata keçirilən iri enerji layihələri Azərbaycanın beynəlxalq mövqeyini əhəmiyyətli dərəcədə gücləndirib. Bu gün dünyada artan qeyri-sabitlik fonunda ölkəmizin etibarlı qlobal aktor kimi artan rolu ABŞ siyasi dairələrində yüksək qiymətləndirilir. Prezident İlham Əliyevin uzunmüddətli və düşünülmüş enerji siyasəti, Azərbaycanın enerji təhlükəsizliyinə verdiyi strateji töhfə ölkəmizi Avrasiyanın enerji xəritəsində əsas oyunçulardan birinə çevirib.

V.Rəhimzadə bildirib ki, Azərbaycanın uğurlu xarici siyasət kursu dövlətimizin maraqlarına əsaslanan çoxvektorlu və balanslaşdırılmış strategiya üzərində qurulub: "Azərbaycan qlobal güclərlə münasibətlərini milli maraqlar əsasında inkişaf etdirir.  ABŞ-nin siyasi elitası üçün məhz bu praqmatik və sabit mövqe önəmlidir. Azərbaycan regionda etibarlı tərəfdaş kimi qəbul edilir. Prezident 

İlham Əliyevin prinsipial mövqeyi və ardıcıl siyasəti ölkəmizin beynəlxalq nüfuzunu gücləndirib. ABŞ siyasi elitasında Prezident İlham Əliyev haqqında səslənən yüksək  fikirlər Azərbaycanın artan beynəlxalq rolunun göstəricisidir. Enerji təhlükəsizliyi, regional sabitlik, balanslı xarici siyasət və iqtisadi inkişaf modeli ölkənin strateji əhəmiyyətini artırır".

Əsmər QARDAŞXANOVA,

"Azərbaycan"