İstanbulun Çağlayan Ədliyyə Sarayında Azərbaycanın Baş prokuroru Kamran Əliyev və Türkiyənin İstanbul şəhərinin Baş prokuroru Akın Gürlek arasında görüş olub.
AZƏRTAC xəbər verir ki, görüş Akın Gürlekin dəvəti ilə Kamran Əliyevin rəhbərlik etdiyi nümayəndə heyətinin İstanbula səfəri çərçivəsində keçirilib.
Toplantıda Baş prokuror Kamran Əliyev qarşı tərəfə dəvətə və yüksək qonaqpərvərliyə görə təşəkkürünü bildirərək, Türkiyə-Azərbaycan birliyinə və qardaşlığına diqqət çəkib.
O, ölkələrimiz arasında formalaşan həmrəylik ruhunun Ümummilli Lider Heydər Əliyevin “Bir millət, iki dövlət” və Türkiyə xalqının Ulu Öndəri Mustafa Kamal Atatürkün “Azərbaycanın sevinci sevincimiz, kədəri kədərimizdir” kəlamları ilə ifadə olunduğunu qeyd edib.
“Dövlət başçıları İlham Əliyev və Rəcəb Tayyib Ərdoğanın siyasi iradəsi və səyləri nəticəsində ölkələrimiz arasında qarşılıqlı əlaqələr bütün sahələr üzrə daha da dərinləşərək strateji xarakter alıb. Bu da qurumlarımız arasında hərtərəfli əməkdaşlıq üçün sabit zəmin yaradıb”, - deyə Kamran Əliyev vurğulayıb.
Öz növbəsində qurumlararası tərəfdaşlıq münasibətlərinin inkişafından məmnunluğunu ifadə edən Akın Gürlek daha əvvəl ölkəmizə etdiyi işgüzar səfərin xüsusi yaddaqalan olduğunu deyib.
Görüşdə iki ölkənin prokurorluq orqanları arasında cinayətkarlığın müxtəlif formalarına qarşı mübarizə, o cümlədən cinayət işləri üzrə qarşılıqlı hüquqi yardım sahələrində praktiki əməkdaşlıq məsələləri, həmçinin hüquqi və institusional əməkdaşlığın genişləndirilməsi perspektivləri, eləcə də qarşılıqlı təlim səfərlərinin təşkili və təcrübə mübadiləsi ətrafında fikir mübadiləsi aparılıb.
Sonra nümayəndə heyəti İstanbul Çağlayan Ədliyyə Sarayının fəaliyyəti ilə yaxından tanış olub.
Görüşdə Azərbaycanın Türkiyədəki səfiri Rəşad Məmmədov və İstanbuldakı baş konsulu Nərminə Mustafayeva iştirak ediblər.
19 (1)jpg_1771885865.jpg)
jpeg_1770645280.jpeg)
jpg_1772216033.jpg)
