Azərbaycanın ilk pediatrı Əbülfəz Qarayevin anadan olduğu gündən 140 il keçir. İlk azərbaycanlı görkəmli pediatr ölkəmizdə ana və uşaqların sağlamlığının mühafizə sisteminin yaradıcısıdır. O, Respublika Uşaq Xəstəxanasının yaradılmasının təşkilatçılarından biridir.
Əbülfəz Qarayevin praktiki, elmi və pedaqoji fəaliyyəti N.Nərimanov adına Azərbaycan Dövlət Tibb İnstitutu (indiki Azərbaycan Dövlət Tibb Universiteti) ilə sıx bağlı olub. 1930-cu ildə Əbülfəz Qarayev bu ali təhsil ocağının Pediatriya kafedrasına assistent kimi qəbul olunub. Tanınmış həkim Ə.Qarayev 1938-ci ildə doktorluq dissertasiyası müdafiə edib. 1939-cu ildə kafedra müdiri seçilib. Onun elmi araşdırmalarının əksəriyyəti, demək olar ki, bağırsaq infeksiyalarına həsr olunub. Bundan başqa, professor qan xəstəliklərinin etiologiyası, patogenezi və müalicə yollarını öyrənib. Əbülfəz Qarayev 1938-ci ildən ömrünün sonuna qədər Azərbaycan Uşaq Həkimləri Cəmiyyətinə rəhbərlik edib. O, Azərbaycan Səhiyyə Nazirliyinin Elmi-Tibbi Şurasının sədri və Uşaqlara Müalicə-Profilaktika Yardımı Şurasının üzvü olub. Azərbaycan Dövlət Tibb İnstitutunun Pediatriya fakültəsi onun təşəbbüsü, rəhbərliyi və bilavasitə iştirakı ilə yaradılıb. Görkəmli həkimin pedaqoji fəaliyyəti dövründə hazırlanmış mütəxəssislərin çoxu bu gün Azərbaycan pediatriyasının qabaqcıl nümayəndələridir. Əbülfəz Fərəc oğlu Qarayev 1952-ci il oktyabr ayının 24-də vəfat etmişdir.
Hazırda Bakının 2 saylı Uşaq Klinik Xəstəxanası görkəmli alimin adını daşıyır.
Bakı Şəhər Mədəniyyət Baş İdarəsi Yasamal Rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası və 2 nömrəli kitabxana filialı xalqı, milləti qarşısında böyük xidmətləri olmuş Azərbaycan pediatriya məktəbinin banisi, professor Əbülfəz Fərəc oğlu Qarayevin 140 illik yubileyi ilə əlaqədar videoçarx hazırlayıb.
Videoçarxda professor Əbülfəz Qarayev həm həkim, həm də şəxsiyyət kimi hörmət və ehtiramla yad edilir. Azərbaycanda pediatriyanın qazandığı nailiyyətlərin sırasında bu alimin gördüyü işlər haqqında məlumat verilir. Alimin həyatının əsas məqamları işıqlandırılır, xidmətinə görə qazandığı mükafatlar qeyd olunur.
Hazırlanan videoçarxı izləyənlər öyrənirlər ki, professor Əbülfəz Qarayev Bakıda, həmçinin respublikanın müxtəlif rayonlarında dövlət uşaq müalicə-profilaktika müəssisələrinin geniş şəbəkəsinin yaradılması işinə qoşulmuş, pediatriyanın nəzəri məsələlərinin araşdırılmasına başlamışdır. Azərbaycanda pediatriyanın qazandığı nailiyyətlərin təməlində, mərkəzində həkim və alim Əbülfəz Qarayevin gördüyü işlər dayanır.
Tibb Universitetinin Pediatriya fakültəsi onun təşəbbüsü, rəhbərliyi və bilavasitə iştirakı ilə yaradılmışdır. Rus, alman və türk dillərini mükəmməl bilən professor-pediatr Əbülfəz Qarayev ömür boyu alimliyi, həkimliyi, parlaq şəxsiyyəti ilə xalqa xidmətin əsl nümunəsini göstərmişdir.
Videoçarxda Azərbaycan Yazıçılar Birliyinin sədri Xalq yazıçısı Anarın görkəmli həkim Əbülfəz Qarayev haqqında söylədiyi bu sözlər izləyənlər tərəfindən maraqla qarşılanmışdır: "Professor Əbülfəz Qarayev bu gün Azərbaycanda "Qarayevlər sülaləsi" kimi tanınan böyük ziyalılar ailəsinin başında məhz öz xeyirxah əməlləri ilə həmişəyaşarlıq qazanmışdır".
Azərbaycan xalqı professor Əbülfəz Qarayevi həm həkim, həm alim, həm də şəxsiyyət kimi həmişə hörmətlə anır, ehtiramla yad edir.
Vahid MƏHƏRRƏMOV,
"Azərbaycan"
19 (1)jpg_1771885865.jpg)
