Özü də beynəlxalq arenada
Bəzən adama elə gəlir ki, beynəlxalq müsabiqələr yalnız orta məktəb şagirdləri və universitet tələbələri, yaxud incəsənət nümayəndələri üçündür. Amma zaman o zamandır ki, nəinki təhsil, incəsənət, eləcə də iqtisadiyyat və sosial sahədə də beynəlxalq arenaya çıxmaq lazımdır.
Bu gün istənilən sahədə əldə olunan uğurlar dünyanın istənilən ölkəsində sərgilənir və dəyərini alır. Götürək Azərbaycan brendi olan DOST-u. Xəbər verildiyi kimi, Əmək və Əhalinin Sosial Müdafiəsi Nazirliyinin tabeliyindəki Dayanıqlı və Operativ Sosial Təminat (DOST) Agentliyi "İnsan Kapitalının İdarə Edilməsi üzrə Mükəmməllik Mükafatı 2024" (Human Capital Management Excellence Awards 2024) beynəlxalq müsabiqəsinin qalibi olub. Cəmi 6 yaşı olan DOST-un bu uğuru birinci və sözsüz ki, sonuncu deyil, baxmayaraq ki, agentliyin əməkdaşlarını özlərinə dost bilənlərin çoxu həssas qrupa aid olan insanlardır, yəni onlarla dostluq etmək üçün böyük ürəyə sahib olmaq lazımdır.
1983-cü ildən Sosial İşçilərin Beynəlxalq Federasiyası tərəfindən hər il mart ayının üçüncü çərçənbə axşamı Dünya Sosial İş Günü elan olunub. Sonralar bir sıra beynəlxalq təşkilatlar da bu təşəbbüsə qoşulublar. Əmək və Əhalinin Sosial Müdafiəsi Nazirliyinin sosial xidmətlər sistemində çalışanlar da həssas kateqoriyalardan olan insanların (tənha ahıl və əlilliyi olan şəxslərin, sağlamlıq imkanları məhdud olan, yaxud sosial təhlükəli vəziyyətdə olan uşaqların, məişət zorakılığından zərər çəkənlərin və b.) sosial xidmətlərə olan tələbatının qiymətləndirilməsi və müəyyənləşdirilməsi, həmin şəxslərə xidmətlərin təşkili istiqamətində fəaliyyət göstərirlər. Deməli, bu sahənin əməkdaşları üçün yalnız bir gün yox, hər gün Sosial İş Günüdür.
Bu cür həssaslığın, diqqətin, məsuliyyətin nəticəsidir ki, DOST Agentliyinin Beynəlxalq Sosial Təminat Assosiasiyasının (BSTA) "Avropa üzrə Yaxşı Təcrübə Mükafatı - 2022" müsabiqəsinə təqdim etdiyi üç layihənin hər biri yüksək dəyərləndirilib. Belə ki, 2022-ci ildə agentliyin "Vətəndaş məmnunluğu monitorinq sistemi", "DOST Agentliyi ləyaqət və bərabər hüquqlar naminə" və "DOST: 65 yaşdan yuxarı şəxslərin sosial müdafiəsi" adlı layihələri müsabiqənin Müstəqil Beynəlxalq Münsiflər Heyətinin qərarı ilə fəxri diplomlara və attestata layiq görülüb. 2023-cü ildə isə DOST Rəqəmsal İnnovasiyalar Mərkəzi (RİM) Böyük Britaniyada keçirilən "Fin Tech Awards 2023" mqsabiqəsinin qalibi seçilib. DOST RİM müsabiqədə "Proaktiv ödənişlər mexanizminin mahiyyəti, sxemi və cəmiyyət üçün əhəmiyyətini əhatə edən məlumatlar" kateqoriyasında iştirak edib və "Dövlət sektoru üzrə proaktiv texnologiyanın aparıcı təminatçısı - 2023" mükafatını alıb. Müsabiqədə Azərbaycanın sosial sahə üzrə elektron uğurları, habelə ölkədə pensiya, müavinət və təqaüdlərin e-sistem üzərindən proaktiv təyinat mexanizmlərinin qurulduğu diqqətə çatdırılıb. Müsabiqənin tədqiqat komandası ölkəmizin təcrübəsini yüksək qiymətləndirib və mükafata layiq görüb. Qeyd edək ki, "Wealth & Finance International" maliyyə və ödənişlər sahəsində yenilikləri araşdıran və 2014-cü ildən eyniadlı jurnalda sosial sahədə yeni uğurlu təcrübələri paylaşan bir təşkilatdır.
DOST bir neçə gün əvvəl verilən beynəlxalq mükafata isə "Ən yaxşı sosial təsir" kateqoriyasında insan kapitalının idarə edilməsinə görə layiq görülüb. "Brandon Hall Group" tərəfindən təşkil olunan müsabiqəyə "Könüllü DOST" proqramının sosial müdafiə, məşğulluq, əlillik, əmək münasibətləri istiqamətlərində DOST xidmətlərinin idarəolunmasına, innovativ təşəbbüslərin reallaşdırılmasına və vətəndaş məmnunluğunun artırılmasına, eləcə də bərabərliyin və inklüzivliyin təmin olunmasına yönləndirmə təcrübəsi təqdim edilmişdi.
Mükafatın təqdimetmə mərasimi 2025-ci il yanvarın 28-30-da ABŞ-nin Florida ştatının Uest Palm Biç şəhərində baş tutacaq. "HCM Mükəmməllik Konfransı 2025"in (HCM Excellence Conference 2025) qala tədbirində ekspert və idarəçilər, media nümayəndələri, eləcə də müxtəlif təşkilatların rəhbər şəxsləri iştirak edəcəklər.
Züleyxa ƏLİYEVA,
"Azərbaycan"
