Azərbaycan Milli Məclisinin Təbii ehtiyatlar, energetika və ekologiya komitəsinin sədri Sadiq Qurbanov və onu müşayiət edən heyət Tacikistan Ali Məclisi Nümayəndələr Palatasının Azərbaycanla dostluq və əməkdaşlıq qrupunun rəhbəri Qayrat Əzizzadə ilə görüşüb.
Görüşdə bildirilib ki, 1992-ci ildə diplomatik münasibətlərin qurulmasından etibarən Tacikistan və Azərbaycanın dostluq münasibətləri davamlı inkişaf edərək möhkəmlənmiş və bu gün strateji tərəfdaşlıq səviyyəsinə yüksəlmişdir. Əldə olunan bütün bu nailiyyətlər Tacikistan Respublikasının Prezidenti Emoməli Rəhmon və Azərbaycan Respublikasının Prezidenti İlham Əliyev arasında formalaşmış səmimi dostluq münasibətlərinin, qarşılıqlı etimadın və güclü siyasi iradənin nəticəsidir.
Məmnunluqla vurğulanıb ki, ölkələrimiz arasında əlaqələr dövlətlərarası, hökumətlərarası və idarələrarası səviyyədə imzalanmış 94-dən artıq beynəlxalq sənəd və sazişə əsaslanır ki, bu da tərəflər arasında əməkdaşlığın yüksək səviyyədə inkişaf etdiyini və diplomatik münasibətlərin səmərəli nəticələr verdiyini göstərir.
Görüş zamanı parlamentlərarası əlaqələrin inkişafının ikitərəfli münasibətlərin daha da möhkəmlənməsinə mühüm töhfə verdiyi diqqətə çatdırılıb. Bildirilib ki, deputatlar arasında qarşılıqlı səfərlərin və təcrübə mübadiləsinin genişləndirilməsi qanunvericilik fəaliyyəti baxımından faydalıdır və tərəflər arasında əməkdaşlığın yeni istiqamətlər üzrə inkişafına şərait yaradır.
Sonda Qayrat Əzizzadə vurğulayıb ki, Tacikistanın Nümayəndələr Palatası bundan sonra da ölkələrimiz arasında tərəfdaşlığın gücləndirilməsi istiqamətində səylərini davam etdirəcək, həm ikitərəfli, həm də çoxtərəfli formatda əməkdaşlığın inkişafına dəstək verəcək.
“Azərbaycan”
jpg_1779366440.jpg)
