Azərbaycan Prezidenti İlham Əliyevlə Çin Xalq Respublikasının Sədri Si Cinpin arasında dostluq, qarşılıqlı etimad və hörmətə əsaslanan fəal siyasi dialoq qurulub. Bu sıx münasibətlər və liderlər arasında siyasi dialoqun yüksək səviyyəsi ölkələrimiz arasında mövcud vəziyyətə və əməkdaşlığa töhfə verir.
AZƏRTAC xəbər verir ki, bu fikirlər xarici işlər nazirinin müavini Elnur Məmmədovun Çinin CGTN (China Global Television Network) telekanalının internet səhifəsində yerləşdirilmiş “Əlaqələrin möhkəmləndirilməsi, gələcəyin formalaşdırılması: Azərbaycan-Çin tərəfdaşlığı” adlı məqaləsində qeyd olunur.
Nazir müavini iki ölkənin qarşılıqlı hörmət, etimad və dəstəyə əsaslanan münasibətlərin tarixindən, inkişafından danışaraq, ötən il Azərbaycan ilə Çin arasında münasibətlərin strateji tərəfdaşlıq səviyyəsinə yüksəlməsinə dair imzalanan Birgə Bəyannamənin əməkdaşlığın müxtəlif sahələrdə genişlənməsini qarşıya məqsəd qoyduğunu bildirib.
Məqalədə qeyd olunur ki, iki ölkə beynəlxalq məsələlərdə qarşılıqlı fəaliyyəti möhkəmləndirməyə, ortaq maraqları birgə müdafiə etməyə, regional və qlobal sülhə, sabitliyə və inkişafa birgə töhfə verməyə qərarlıdır və Azərbaycan “Vahid Çin” prinsipini hər zaman dəstəkləyir. BMT Təhlükəsizlik Şurasının daimi üzvü olan Çin də Azərbaycanın müstəqilliyinə, suverenliyinə və ərazi bütövlüyünə daim hörmətlə yanaşır.
Nazir müavini yazıda ölkələrimizin beynəlxalq və regional təşkilatlar çərçivəsində əməkdaşlığından, bir-birinin təşəbbüslərinə olan dəstəyindən söz açıb.
İqtisadi-ticari əlaqələrə toxunan E.Məmmədov ötən il ticarət dövriyyəsinin həcminin 20 faiz artdığını, Çinin Azərbaycanın 5 əsas ticarət tərəfdaşından biri olduğunu vurğulayıb. İki ölkənin iqtisadi əlaqələrində nəqliyyat-logistika sahəsinin xüsusi önəm kəsb etdiyini vurğulayan nazir müavini əlavə edib ki, Azərbaycan coğrafi və geosiyasi mövqeyi sayəsində tarixən şərq ilə qərb arasında körpü rolunu oynayıb. Hazırda ən azı 3 böyük nəqliyyat dəhlizi Azərbaycan ərazisindən keçir. Bu mənada Trans-Xəzər Beynəlxalq Nəqliyyat Marşrutu – Orta Dəhliz xüsusi əhəmiyyət daşıyır. Ölkələrimiz strateji tərəfdaşlıq haqqında Birgə Bəyannamədə “Bir kəmər, bir yol” təşəbbüsü çərçivəsində bütün sahələrdə praktiki əməkdaşlığı inkişaf etdirməyə sabiq olduqlarını qeyd ediblər.
Məqalədə iki ölkənin xalqları arasında əlaqələrdən də söz açılıb, bu xüsusda Azərbaycanın Çin vətəndaşlarına vizasız səyahət imkanı yaratdığı vurğulanıb. Bakı ilə Çinin Pekin və Urumçi şəhərləri arasında birbaşa uçuşlar son bir neçə ildə Çindən Azərbaycana gələn turistlərin sayında davamlı artımı təmin edən amillərdən biri kimi göstərilib.
