Kambocanın Baş naziri Hun Manetin Azərbaycana səfəri iki ölkə arasında əməkdaşlığın mövcud vəziyyəti, gələcək inkişaf istiqamətləri və qarşılıqlı tərəfdaşlığın strateji perspektivlərini müəyyənləşdirdi. Prezident İlham Əliyevin səsləndirdiyi fikirlər göstərdi ki, Azərbaycan-Kamboca münasibətləri siyasi və iqtisadi dialoqun dərinləşdirilməsi, nəqliyyat və rəqəmsal transformasiya sahələrində əməkdaşlığın gücləndirilməsi üçün yeni mərhələyə qədəm qoymaq potensialına malikdir.
Milli Məclisin deputatı Nigar MƏMMƏDOVA qəzetimizə açıqlamasında deyib ki, Azərbaycan və Kamboca arasında münasibətlərin mühüm istiqamətlərindən biri beynəlxalq təşkilatlar çərçivəsində əməkdaşlıqdır. Prezident İlham Əliyevin bəyanatında BMT, Qoşulmama Hərəkatı və AQEM çərçivəsində mövcud olan siyasi əlaqələrə xüsusi diqqət yetirilməsi bu əməkdaşlığın əhəmiyyətini təsdiqləyir: “Qlobal problemlərin kollektiv həllinə ehtiyacın artdığı bir dövrdə dövlətlər arasında qarşılıqlı anlaşma və dəstək xüsusi əhəmiyyət kəsb edir. Azərbaycan və Kambocanın beynəlxalq təşkilatlarda dialoqu inkişaf etdirməsi ortaq maraqları müəyyənləşdirmək, çoxtərəfli əməkdaşlıq imkanlarını genişləndirmək və beynəlxalq gündəlikdə konstruktiv mövqe nümayiş etdirmək baxımından əhəmiyyətlidir. Məlum olduğu kimi, Azərbaycanın xarici siyasətində Asiya ölkələri ilə əlaqələrin genişləndirilməsi mühüm istiqamətlərdən biridir. Kamboca ilə siyasi təmasların intensivləşdirilməsi isə Cənub-Şərqi Asiya regionunda Azərbaycanın diplomatik və iqtisadi əlaqələrinin şaxələndirilməsinə xidmət edir”.
Deputat qeyd edib ki, münasibətlərin gələcək inkişafında iqtisadi əməkdaşlığın xüsusi yeri var. Hazırda iki ölkə arasında ticarət dövriyyəsi aşağı səviyyədə olsa da, geniş inkişaf imkanları mövcuddur. Dövlət başçısının da vurğuladığı kimi, coğrafi məsafə müasir dünyanın texnoloji və logistika imkanları fonunda əməkdaşlıq üçün həlledici maneə hesab edilə bilməz. Əsas məsələ mövcud imkanların düzgün qiymətləndirilməsi və biznes subyektləri arasında davamlı əlaqələrin qurulmasıdır. “Bu baxımdan, Azərbaycan və Kamboca şirkətlərinin iştirakı ilə keçirilən biznes forumu iqtisadi münasibətlərin inkişafı üçün mühüm platformadır. Belə tədbirlər potensial tərəfdaşların müəyyənləşdirilməsinə və birgə layihələrin hazırlanmasına şərait yaradır. Birgə işçi qrupunun yaradılması da əməkdaşlığın institusional əsaslarının möhkəmləndirilməsi baxımından əhəmiyyətlidir”, – deyə o əlavə edib.
N.Məmmədova bildirib ki, qlobal iqtisadiyyatda nəqliyyat və logistika sistemləri də dövlətlərin rəqabət qabiliyyətini müəyyən edən əsas amillərdən birinə çevrilib. Beynəlxalq ticarət marşrutlarının şaxələndirilməsi, təchizat zəncirlərinin dayanıqlılığının artırılması və yükdaşımaların səmərəliliyinin yüksəldilməsi həm inkişaf etmiş, həm də inkişaf etməkdə olan ölkələr üçün strateji əhəmiyyət daşıyır.
Deputat vurğulayıb ki, Azərbaycanın Avropa ilə Asiya arasında mühüm nəqliyyat və tranzit qovşağı kimi artan rolu fonunda Kamboca ilə nəqliyyat və logistika sahəsində əməkdaşlığın inkişafı bu baxımdan xüsusi perspektivə malikdir. Cənub-Şərqi Asiyanın istehsal və ticarət məkanları ilə Azərbaycanın tranzit imkanları arasında əlaqələrin qurulması yeni iqtisadi münasibətlər üçün zəmin yaradır.
N.Məmmədova qeyd edib ki, təhsil sahəsində əməkdaşlıq isə gələcək mütəxəssislərin hazırlanması, innovasiyaların təşviqi və ölkələrin bir-birinin iqtisadi və mədəni xüsusiyyətlərini daha dərindən anlaması baxımından əhəmiyyətlidir: “Azərbaycan-Kamboca münasibətlərinin mühüm elementlərindən biri də parlamentlərarası əlaqələrdir. Hər iki ölkədə parlamentlərarası dostluq qruplarının fəaliyyət göstərməsi siyasi dialoqun institusional əsaslarının möhkəmləndirilməsinə xidmət edir. Kambocanın dəstəyi ilə Azərbaycan parlamentinin ASEAN Parlamentlərarası Assambleyasında müşahidəçi statusu əldə etməsi Azərbaycanın Cənub-Şərqi Asiya ilə əlaqələrinin genişləndirilməsi baxımından əhəmiyyətli hadisədir. Bu status region ölkələrinin siyasi və iqtisadi gündəliyini daha yaxından izləmək, parlament diplomatiyasını inkişaf etdirmək üçün əlavə imkanlar yaradır”.
Əsmər QARDAŞXANOVA,
“Azərbaycan”
