Lerikdə Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Aqrar biznes festivalı keçirilib. Tədbirdə Lerik Rayon İcra Hakimiyyətinin başçısı Əkbər Abbasov, Aqrar İnnovasiya Mərkəzinin direktoru Anar Cəfərov, Azərbaycan Respublikası Sahibkarlar Təşkilatları Milli Konfederasiyasının vitse-prezidenti Jalə Hacıyeva və fermerlər iştirak ediblər.
Rayon Mədəniyyət mərkəzinin qarşısındakı meydanda düzənlənən festivalda fermerləri maraqlandıran müxtəlif kənd təsərrüfatı təyinatlı məhsullar nümayiş olunub, ayrı-ayrı qurumların mütəxəssisləri dövlət və özəl sektorun əməkdaşlığı çərçivəsində fermer və sahibkarlara göstərilən dəstək barədə məlumat veriblər.
Çıxış edən Ə.Abbasov ölkənin bütün regionlarında olduğu kimi, Lerikdə də kənd təsərrüfatının inkişafına diqqət yetirildiyini və belə tədbirlərin təqdirəlayiq olduğunu diqqətə çatdırıb, fermerlərin maarifləndirilməsi istiqamətində rayonda görülən işlərin mühüm əhəmiyyət daşıdığını və aqrar sahəyə öz töhfəsini verəcəyini vurğulayıb.
A.Cəfərov isə bölgələrdə keçirilən Aqrar Biznes festivallarının əsas məqsədinin regionlarda yaşayan fermerlərin kənd təsərrüfatı məhsul və texnologiyalara əlçatanlığının təmin edilməsi olduğunu bildirib, fermerlərin aqrar innovasiyalara və maliyyə mənbələrinə çıxışını əlçatan edən bu festivallarda əməkdaşlıq imkanlarından danışıb.
J.Hacıyeva da çıxış edərək aqrar sahədəki yeniliklərlə tanış olmaq, istehsalçılarla birbaşa əlaqə qurmaq, təcrübə mübadiləsi aparmaq imkanı baxımından bölgələrdə keçirilən belə tədbirlərin fermerlər, eyni zamanda sahibkarlar üçün əhəmiyyətindən söz açıb.
Festival çərçivəsində fermerlərə aqrar sahənin prioritet istiqamətlərinə uyğun təlim də keçirilib. Sərgi bölməsində isə müxtəlif kənd təsərrüfatı təyinatlı məhsullar, bitki mühafizə vasitələri, müxtəlif bitki və tərəvəz toxumları nümayiş olunub.
Seyran CAVADOV,
"Azərbaycan"
jpg_1762509871.jpg)
jpg_1762507959.jpg)
