Azərbaycanın Mərkəzi Asiya Dövlət Başçılarının Məşvərət Görüşündə tamhüquqlu üzv kimi iştirakı ticarət və logistika dəhlizlərinin səmərəliliyinin artırılmasına, eləcə də əlaqələrin Çin-Avropa ekspress dəhlizinin daha yaxşı inteqrasiyası üzərində qurulmasına töhfə verəcək.
Bunu AZƏRTAC-a açıqlamasında beynəlxalq münasibətlər üzrə amerikalı ekspert Peter Tase söyləyib.
O qeyd edib ki, Azərbaycan Şərq və Qərb arasında yük həcmlərinin artırılmasında, müasir beynəlxalq logistika sisteminin formalaşdırılmasında və quru nəqliyyat əlaqələrinin yaxşılaşdırılmasında strateji rol oynayır. Təhlükəsiz, davamlı və rəqabətqabiliyyətli multimodal nəqliyyat marşrutlarının yaradılması Mərkəzi Asiya ölkələrinin inkişafı üçün həyati əhəmiyyət daşıyır və Azərbaycan logistika quru dəhlizlərinin, əlaqəli ticarət yollarının inkişafında aparıcı ölkədir. Bununla yanaşı, Azərbaycanın aqrar iqtisadiyyatdakı ambisiyalı layihələri və müasir şəhərsalma ənənələri də regionun inkişafına töhfə verir.
Regional inteqrasiya və diplomatik liderlik
Amerikalı ekspert bildirib ki, rəsmi Bakı tərəfindən irəli sürülən bu dəyərli təşəbbüslər Mərkəzi Asiya ölkələrinin daha geniş iqtisadi inteqrasiyasına mühüm töhfədir. Azərbaycanın bu nüfuzlu çoxtərəfli kluba inteqrasiyası geosiyasi nəticələrə malik tarixi qərardır və Azərbaycan xarici siyasətinin həyata keçirilməsi və Bakının milli təhlükəsizlik maraqlarının qlobal səhnədə təşviqi üçün təsirli əməkdaşlıq fəsli açıb.
“Mərkəzi Asiya ölkələri Şərq-Qərb ticarət yolları və Zəngəzur dəhlizi kimi dinamik quru nəqliyyat marşrutlarına bağlı olduqları üçün strateji əhəmiyyət daşıyır. Zəngəzur dəhlizi regionun iqtisadi və sənaye inteqrasiyasını gücləndirə, həmçinin dəniz ticarət yollarında yaranan çətinliklərdən qaynaqlanan qlobal asılılığı azalda bilər. Ümumilikdə isə Azərbaycan Prezidentinin yaxın vaxtlarda Daşkəndə səfəri Bakının xarici siyasətində mühüm və əhəmiyyətli bir addım kimi qiymətləndirilir”, - deyə P.Tase vurğulayıb.
Ekspert əlavə edib ki, bu il Qəbələdə baş tutan Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü Mərkəzi Asiya və türkdilli ölkələr üçün regional inteqrasiya və inkişaf platformasının formalaşması baxımından mühüm əhəmiyyət daşıyır.
