Erməni diasporu ilə əlaqələrə malik Aram Bransonun bomba hazırlamağa çalışması və potensial olaraq başqalarına bomba hazırlamaqla bağlı təlimat, yaxud istiqamət verməsi ilə bağlı xəbərlər narahatlıq doğurur.
Bu sözləri AZƏRTAC-ın ABŞ bürosuna açıqlamasında Qlobal Siyasət İnstitutunun prezidenti, Vaşinqtondakı Bay Atlantik Universitetinin (BAU) politologiya və beynəlxalq münasibətlər üzrə professoru Paolo Von Şirah deyib.
O bildirib ki, xüsusilə bu hal Azərbaycan və Ermənistanın münasibətləri yaxşılaşdırmaq üçün danışıqlar apardığı bir zamanda baş verir və indiki halda əlaqələr çox həssasdır. “Bilirsiniz ki, ABŞ-dakı erməni diasporu illərdir ermənilərin adından vəkillik etməyə çalışıb və onların guya acınacaqlı vəziyyətlərini, əzablarını böyütməyə cəhd göstərib. Təbii ki, azərbaycanlıların bütün bunlara fərqli baxışı var. Biz bunu bilirik. Bu məsələdə bu gəncin müəyyən edilməsi çox müsbət haldır. İstintaq davam edir və o, həbs olunacaq. Lakin əsas məsələ odur ki, bütün bunlar nə ilə bağlıdır? Bu, təbii ki, terrordur. Bu, erməni məsələsini zorakı üsullarla təbliğ edən revanşist ideyalardan qaynaqlanan terrorizmdir və təbii ki, qanuna ziddir”, - deyə amerikalı ekspert vurğulayıb.
Paolo Von Şirah əlavə edib ki, bu şəxsin təkbaşına və ya başqalarının dəstəyi ilə fəaliyyət göstərməsi əsas suallardan biridir. “O, bomba hazırlamaqla azərbaycanlı dövlət məmurlarını, iş adamlarını və ya siyasətçiləri qətlə yetirməyə cəhd edib. Lakin o, tək hərəkət edib? Bu, məsələnin başqa bir tərəfidir və hadisəni daha da ciddiləşdirir. Təəssüf ki, hər bir cəmiyyətdə siyasi məsələlərlə bağlı zorakı hissləri “motivasiya” edən, çılğın fikirlərə malik radikal insanlar olur. İndiki halda bu, ciddi məsələdir, lakin dramatik səviyyədə deyil. Amma əgər araşdırma bu işdə başqalarının və ya erməni fəalların gizli şəbəkəsinin iştirakını aşkara çıxarsa, bu, artıq məsələni daha qəliz məcraya çıxarar. Bunu müəyyən etmək lazımdır. Hesab edirəm ki, hüquq-mühafizə orqanları, müstəntiqlər və ya məsələni araşdıran digər rəsmilər onun təkbaşına və ya kimlərləsə hərəkət etdiyini araşdırırlar. Əgər gənc təkbaşına hərəkət edibsə, bu məsələ həll olunmalı və o, cəzasını almalıdır. Çünki bütün sivil ölkələrdə, o cümlədən ABŞ-da açıq-aydın siyasi məqsədi təşviq etmək üçün zorakılıq üsullarından istifadə etmək qanuna ziddir. Lakin onun digər təşkilatlarla birlikdə hərəkət etməsi, pul və ya digər vasitələrlə dəstək alması artıq başqa məsələdir. İstintaqın cinayətdə əli ola biləcək digər insanların da müəyyənləşdirilməsinə gətirib çıxaracağına ümid edirəm”.
