Adıyaman vilayəti son iki ildə Türkiyənin ən böyük tikinti sahələrindən birinə çevrilib. Dövlət 2023-cü ilin fevralında baş vermiş zəlzələlərin nəticələrini tamamilə aradan qaldırmaq üçün maksimum səylər göstərir.
Bu barədə jurnalistlərə Türkiyənin Adıyaman vilayətinin valisi Osman Varol məlumat verib.
Vali xatırladıb ki, təkcə Adıyaman vilayətində 2023-cü ilin fevral ayında 5953 yaşayış binasının dağıntıları altında xilasetmə əməliyyatları aparılıb. “Zəlzələ əyalətdə 8561 nəfərin ölümünə, 17499 nəfərin yaralanmasına səbəb olub. Xilasetmə əməliyyatları fevralın 6-dan 16-dək, o cümlədən xarici ölkələrin iştirakı ilə on gün davam edib”, - deyən vali əlavə edib ki, yeddi nəfər hələ də itkin düşənlər siyahısında yer alır.
O.Varol bildirib ki, əyalətin yaşayış fondunu təşkil edən 115 067 binadan 28 483-ü yeraltı təkanlar nəticəsində dağılıb. Daha beş minə yaxın bina əsaslı təmir və bərpa tələb edirdi.
“Ümumilikdə, Adıyaman vilayətinin mənzil fondunun üçdəbirindən çoxu zədələnib” deyən qubernator əlavə edib ki, fəlakət bölgəsində evlərini itirmiş 125 212 yerli sakinin yerləşdirilməsi üçün 2023-cü ilin fevral ayından Adıyamanda onlarla konteyner şəhərciyi yaradılıb. Eyni zamanda, vilayətin mənzil fondunun bərpası istiqamətində işlərə başlanılıb.
Təkcə Adıyamanda dövlət tərəfindən 29 987 şəhər tipli evin və 8 449 kənd binasının tikintisinə başlanılıb. “Bundan başqa, dövlət tərəfindən 12 529 evin tikintisində vətəndaşlara dəstək göstərilib. Bütövlükdə, əyalətdəki ev və yaşayış obyektlərinin ümumi sayının 36,5 faizinin bərpası nəzərdə tutulub. Tikintisi davam edən bütün yaşayış binalarının 86 faizinin sahibləri püşkatma yolu ilə müəyyən edilib”, - deyən Varol, həmçinin tikinti işlərində 182 min nəfərin iştirak etdiyini bildirib.
Vali bildirib: “Bütün layihələr rayonun memarlıq ənənələrinə uyğun hazırlanır. Vilayətə, o cümlədən sosial infrastruktura dəymiş ziyanın tamamilə aradan qaldırılması üçün addımlar atılır”.
19 (1)jpg_1771885865.jpg)
