Rayonda şəhidlərə ehtiram, şəhid ailələrinə və qazilərə xüsusi diqqət var
Abşeron rayonunda şəhid ailələri və qazilərə göstərilən yüksək qayğı həm dövlət siyasəti, həm də vicdan borcudur. Azərbaycanın suverenliyi və torpaqlarımızın bütövlüyü uğrunda canlarından keçən şəhidlərimiz xalqımızın zəfər tarixini öz qanları ilə yazmış əbədi qəhrəmanlardır.
Onların ailələri isə cəmiyyətin, xüsusən dövlətin müqəddəs əmanətidir. Dövlətimiz bu əmanətə xüsusi diqqətlə yanaşır. Prezident İlham Əliyev dəfələrlə vurğulamışdır ki, şəhid ailələrinə, müharibə iştirakçılarına verilən dəstək dövlət siyasətinin mərkəzində dayanır.
Bu yanaşma yalnız sözlə deyil, illərdir davam edən ardıcıl və sistemli tədbirlərlə öz təsdiqini tapır. Şəhid ailələrinə göstərilən qayğının ən bariz nümunələrindən biri də ölkənin Birinci vitse-prezidenti Mehriban xanım Əliyevanın fəaliyyətidir. Onun şəhid ailələrinə münasibəti mənəvi baxımdan olduqca nümunəvidir. Mehriban xanımın rəhbərlik etdiyi Heydər Əliyev Fondu şəhid ailələrinin rifahının yaxşılaşdırılması, onların övladlarının təhsili, sağlamlığı, mənəvi dayanıqlığı üçün ardıcıl layihələr həyata keçirir. Mehriban xanim Əliyevanin hər bir çıxışında bu ailələrə göstərilən münasibət yalnız sosial məsuliyyət deyil, mənəvi borc kimi səslənir.
Azərbaycanın böyük və sürətlə inkişaf edən regionlarından biri olan Abşeron rayonunda şəhid ailələrinin sayı da kifayət qədər çoxdur. 800-ə yaxın abşeronlu gənc 44 günlük Vətən müharibəsində iştirak etmişdir. Onlardan 42 nəfəri şəhid olmuş və 96 nəfər döyüşlərdə sağlamlığını itirərək Vətən müharibəsi əlili statusu almışdır. Həmçinin ölkə üzrə digər rayonların hərbi çağırış və səfərbərlik idarələri tərəfindən döyüşlərə qatılmış 133 Vətən müharibəsi şəhidinin ailəsi Abşeron ərazisində yaşayır. Ümumilikdə isə Abşeronda 219 Birinci Qarabağ müharibəsi, 175 Vətən müharibəsi şəhid ailəsi, 160 Vətən müharibəsi əlili, 145 şəhid övladı, 1000-ə yaxın müharibə iştirakçısı var. Rayon ərazisində yeni salınan "Şəfəq" qəsəbəsində respublikamızın digər rayonlarından olmaqla 411 şəhid ailəsi, 826 müharibə əlili yaşayır.
Rayonda şəhid ailələrinin və qazilərin sosial rifahının yaxşılaşdırlması istiqamətində xeyli işlər görülür. Onlar yeni ev və mənzillərlə təmin olunur, kommunal və tibbi xitmətlərdən güzəştli şərtlərlə istifadə edir, qaldırdıqları bütün problemlər operativ həllini tapır. Şəhid övladlarının təhsil imkanlarından tam yararlanması üçün də hər cür şərait yaradılıb. Uşaq bağçalarından ali təhsil müəssisələrinədək müxtəlif pillələrdə onlar üçün güzəştlər və dəstək proqramları mövcuddur.
Şəhidlərin xatirəsini əbədiləşdirmək üçün də bir sıra addımlar atılıb. Xırdalan şəhərinin mərkəzində Birinci Qarabağ və Vətən müharibələrində canından keçən Abşeron şəhidlərinin adlarının əbədiləşdirildiyi möhtəşəm Zəfər kompleksi-Xatirə abidəsi ucaldılmışdır. Şəhid ailələrinin müqəddəs ziyarətgahına çevrilmiş bu abidə hər bir şəhidin yaxını üçün ən böyük mənəvi dəyərdir. Bundan başqa, küçələrə şəhid adları verilmiş, xatirə lövhələri asılmışdır. Şəhid adları verilmiş küçələrdə abadlıq, təmir, isıqlandırma işləri həyata keçirilmişdir. Kənd və qəsəbələrdə şəhidlərin dəfn olunduğu xiyabanlar daim diqqətdə saxlanılır, ətrafinda yaşıllaşdırma işləri aparılır. Şəhidlərin doğum və həlak olma tarixlərində ictimaiyyət nümayəndələrinin iştirakı ilə tədbirlər keçirilir. Məktəblərdə, mədəniyyət ocaqlarında onların həyat və qəhrəmanlıq yolundan bəhs edən tədbirlər, xatirə gecələri təşkil olunur.
Rayon rəhbərliyinin şəhid ailələri ilə birbaşa və daimi ünsiyyəti onlara mənəvi güc verir. Müntəzəm olaraq onların evlərinə baş çəkilir, problemləri dinlənilərək tez bir zamanda həll edilir. Bu, dövlətin şəhid ailələrinə olan diqqətini təkcə sözdə deyil, əməldə də göstərir.
Diqqətçəkən və ən vacib amillərdən biri də şəhid ailələrinin vətənpərvər övlad yetişdirən ailə modeli, qazilərimizin isə vətənin çətin günündə şücaət göstərən qəhrəmanlıq nümunəsi kimi cəmiyyətə təqdim olunmasıdır. Çünki rayonun bütün ictimai işlərində fəallıq göstərən bu ailələr və qazilər təkcə xüsusi qayğı göstərilən deyil, həm də nümunə kimi cəmiyyətə istiqamət verən insanlardır. Rayonda belə ailələrin birliyi qorunur. Şəhid ailəsinin başını dik saxlayan, qazinin əlindən tutan, cəmiyyətə vətən sevgisini aşılayan belə ailələr Abşeronun qürur işığıdır. Onların əsas dayağı qayğı, sevgi və mənəvi dəyərlərə bağlılıqdır.
Akif ƏLİYEV,
"Azərbaycan"
