ABŞ may ayında Afrikadakı ən böyük hərbi təlimləri olan "African Lion" - "Afrika aslanı"nı keçirməyi planlaşdırır. Təlimin əksər hissəsi Mərakeşdə keçiriləcək və 19 Afrika ölkəsindən, Avropa, Cənubi Amerika və Yaxın Şərqdəki bir neçə ölkədən qoşunları cəlb edəcək. Bu barədə ABŞ Silahlı Qüvvələri Afrika Komandanlığının (AFRICOM) rəhbəri general Daqvin Anderson məlumat verib.
"Afrikadakı ən böyük təlimimiz Mərakeşdə keçiriləcək və "Afrika aslanı" adlanacaq. May ayında onu səbirsizliklə gözləyirik. "Afrika aslanı" 19 Afrika ölkəsini, Avropanın 6 ölkəsini və Cənubi Amerika və Yaxın Şərqdən bir neçə tərəfdaşı əhatə edəcək", - deyə o, brifinqdə bildirib.
D. Anderson əlavə edib ki, təlimlərin bir hissəsi olaraq ayrı-ayrı manevrlər Tunis, Qana və Seneqalda keçiriləcək.
Hərbi komandanın sözlərinə görə, ABŞ artıq Mozambikdə 14 Afrika və beş Avropa ölkəsini, eləcə də iki Hind-Sakit Okean dövlətini əhatə edən "Cutlass Express" təlimi keçirir. O, həmçinin Keniya, Tanzaniya və Cibutidə keçiriləcək "Associated Accord" təlimindən də bəhs edib. D. Anderson vurğulayıb ki, bütün təlimlər terrorizm, qaçaqmalçılıq və narkotik ticarəti kimi ümumi təhdidlərlə mübarizə aparmaq məqsədi daşıdığı üçün çoxtərəfli xarakter daşıyır.
Generaldan sonra brifinqdə çıxış edən serjant mayor Qarrik Banfild əlavə edib ki, ABŞ həmçinin Kot-d'İvuar və Liviyada "Flintlock" təlimi keçirəcək.
"African Lion" ABŞ hərbçilərinin iştirak etdiyi illik beynəlxalq hərbi təlimdir. 2025-ci ildə Mərakeşdəki manevrlərdə təxminən 50 ölkədən 10 minə yaxın əsgər iştirak edib.
Xatırladaq ki, oktyabr ayında AFRICOM rəhbəri və Mərakeş Silahlı Qüvvələrinin Baş Müfəttişi general Məhəmməd Berrid təlimləri "iki ölkənin silahlı qüvvələri arasında qarşılıqlı əlaqənin ən yaxşı nümunəsi" adlandırıblar.
Rizvan CƏFƏROV,
"Azərbaycan"
19 (1)jpg_1771885865.jpg)
