ABŞ dövlət katibi Marko Rubio çərşənbə axşamı bildirib ki, Vaşinqton İran müharibəsindən sonra NATO alyansının dəyərini yenidən qiymətləndirə bilər. O, müttəfiqlərin Amerika hərbi kampaniyasını dəstəkləməkdə istəksizliyi ilə bağlı artan məyusluğu qeyd edib.
AZƏRTAC xarici mediaya istinadla xəbər verir ki, ABŞ diplomatiyasının rəhbəri “FOX News” telekanalına verdiyi müsahibədə qeyd edib: “Bu münaqişə başa çatdıqdan sonra münasibətləri yenidən nəzərdən keçirməli olacağıq. NATO-nun ölkəmiz üçün dəyərini yenidən nəzərdən keçirmək lazım gələcək. Nəticə etibarilə, bu, Prezidentin verəcəyi qərardır”.
Rubio NATO müttəfiqlərini ABŞ-nin hərbi bazalardan istifadə tələblərini rədd etdiklərinə görə tənqid edərək deyib: “Biz onlardan hava hücumları keçirməyi istəmirik. Onların hərbi bazalarından istifadə etməyə icazə verilməsinə ehtiyac duyduğumuz vaxtda rədd cavabı alırıq. Bəs biz niyə NATO-dayıq?”
Özünün də uzun müddətdir NATO-nun ən güclü müdafiəçilərindən biri olduğunu deyən Rubio qeyd edib ki, alyans ABŞ-yə Avropadakı bazalar vasitəsilə qlobal miqyasda güc nümayiş etdirməyə icazə verib. Lakin o, ittifaqın “birtərəfli” mövqeyi ilə bağlı xəbərdarlıq edib. “Əgər ehtiyac duyduğumuz vaxtda bu bazalardan istifadə etməyə icazə verilməyəcəksə, bütün bu Amerika qüvvələri regionda niyə yerləşdirilib?” -deyə o bildirib.
Dövlət katibinin bu sözləri Avropada bir neçə müttəfiqin ABŞ-nin İran müharibəsi ilə bağlı tələblərini rədd etdiyi və ya məhdudlaşdırdığı, o cümlədən müharibənin qanuniliyi, NATO ilə məsləhətləşmələrin olmaması ilə bağlı narahatlıqlar üzündən bazalara və hava məkanına girişin qadağan edildiyi bir vaxta təsadüf edir.
İtaliya bu yaxınlarda ABŞ-nin Siciliyadakı hərbi bazaya təyyarələrin enməsi tələbinə mənfi cavab verib, İspaniya isə müharibə ilə əlaqəli əməliyyatlar üçün öz bazalarından və ya hava məkanından istifadəyə icazə verməkdən imtina edib. Böyük Britaniya, Fransa və Almaniya da daxil olmaqla digər müttəfiqlər rollarını regional tərəfdaşlara müdafiə dəstəyi ilə məhdudlaşdırır və gərginliyin azaldılmasına çağırır.
