Siyəzənli məktəbli boş vaxtını smartfonla əylənməyə yox, kitab oxumağa həsr edir
Texnologiyanın inkişafı məsafələri yaxınlaşdırsa da, bizi kitab-dəftərdən uzaqlaşdırıb. Oxumaq, yazmaq vərəqdən kompüterə keçib və masaüstü kitabları planşetlər, smartfonlar əvəzləyib.
Kitab mağazaları isə marketlərə çevrilib. İndi insanların beyin yox, mədə aclığı var. Olmayan elmə, savada maraqdır. Əvəzində nə qədər istəsən mobil telefon satışı və təmiri köşkləri kök salıb ətrafımızda.
Bax, belə bir zamanda kitabla bağlı inana bilmədiyimiz tədbirlər də keçirilir. Məsələn, Siyəzəndə pandemiya dövründə "Evdə qal, kitab oxu" devizi altında böyük bir kampaniya təşkil olunmuşdu. Təxminən rayonun 10-dan çox kəndində və rayon mərkəzində keçirilən bu kampaniyada 3 mindən çox siyəzənli iştirak etmişdi. Xaçmaz Regional Mədəniyyət İdarəsinin Siyəzən rayon 9 saylı Sədan kənd filial kitabxanasının müdiri İsmayıl Muradzadə deyir ki, həmin günlər 121 kitab insanlar arasında paylaşılaraq oxunmuşdu. Oxucular daha çox bədii ədəbiyyatı seçmişlər.
İndi Siyəzəndə həmin ənənə davam edir. Məktəb kitabxanalarında keçirilən bədii ədəbiyyat oxucu günlərində ətrafda yaşayan və mütaliə etmək istəyənlərə kitablar paylanır. Hətta rayonun kəndlərində belə bu cür tədbirlər maraqla qarşılanır. Bu günlər Sədan kəndində "Kitab oxuyaq!" adlı tədbir keçirilib. Tədbir çərçivəsində kənd kitabxanasının həyətində açıq havada oxucularla görüş olub. Oxucular təqaüddə olan polis mayoru Niyətqulu Kərimov, kənd ərazi nümayəndəsinin müavini Qurban Abbasov, sakinlər Qabil Qanbayev, Nahid Eyvazov, sahibkar Azər Səfərov çıxış edərək bu ənənənin davamlı olmasını arzu ediblər.
İştirakçılara tanınmış yazıçılarla yanaşı, Sədanın 14 yaşlı sakini Amin Muradzadənin yenicə işıq üzü görən "Siyəzənim - ilk şerim mənum" adlı kitabı da təqdim edilib. Qeyd edək ki, Amin hazırda Siyəzən rayon C.Cabbarlı adına 1 saylı tam orta məktəbin 9-cu sinif şagirdidir. Dərs əlaçısıdır. Şeir yazmaqdan savayı Siyəzən rayon Uşaq İncəsənət Musiqi Məktəbində qarmon ixtisası üzrə təhsil alır. Özünün dediyi kimi, kitaba sevgi içindən gəlir. Mobil telefondan istifadə etməyən məktəbli gələcəkdə hüquqşünaş olmaq arzusundadır. Hələlik isə elə həmin tədbirdə iştirakçılara onun kitabı hədiyyə edilib.
A.ƏLİYEV,
"Azərbaycan"
jpg_1765410473.jpg)
jpg_1765188547.jpg)
