Sumqayıt Dövlət Universitetində (SDU) "Sumqayıtlı gənc elçilər: Qərbi Azərbaycana qayıdış" mövzusunda konfrans keçirilib. Öncə qonaqlar Ümummilli Lider Heydər Əliyevin universitetin foyesindəki büstü önünə gül dəstələri düzüb, Qərbi Azərbaycana həsr olunmuş rəsm sərgisi ilə tanış olublar. 

Konfransı giriş sözü ilə açan SDU-nun rektoru vəzifəsini icra edən AMEA-nın müxbir üzvü, professor Əminağa Sadıqov "Sumqayıtlı gənc elçilər: Qərbi Azərbaycana qayıdış" mövzusunda konfrasın keçirilməsinin təqdirəlayiq hal olduğunu bildirib. O, konfransın Ulu Öndər Heydər Əliyevin ideyaları əsasında və Azərbaycan Prezidenti İlham Əliyevin bilavasitə rəhbərliyi ilə həyata keçirilən milli ideologiyanın vacib istiqamətlərindən olan Qərbi Azərbaycana Qayıdış Konsepsiyasının reallaşmasına əhəmiyyətli töhfə vərəcəyinə əminliyini ifadə edib. Natiq gənc nəslin vətənpərvərlik ruhunda tərbiyəsində tarixi yaddaşın əhəmiyyətini xüsusi vurğulayıb və konfransın işinə uğurlar arzulayıb.

Konfransda iştirak edən elm və təhsil nazirinin müavini Firudin Qurbanov Qərbi Azərbaycanın tarixi, mədəniyyəti, adət-ənənələrinin öyrənilməsi və tədrisi istiqamətində mühüm işlərin həyata keçirildiyini nəzərə çatdırıb. Bildirib ki, ölkədəki təhsil ocaqlarında qərbi azərbaycanlıların tarixi torpaqlarına qayıdışı ilə bağlı məlumatlandırma sessiyalarının keçirilməsi çox əhəmiyyətlidir və əsas məqsəd Qərbi Azərbaycanın tarixi həqiqətlərini gələcək nəsillərə çatdırmaqdır. Nazir müavini tarixə nəzər salaraq öz doğma torpaqlarından qovulmuş soydayşlarımıza Ulu Öndər Heydər Əliyevin və Prezident İlham Əliyevin diqqət və qayğısından, Qərbi Azərbaycana Qayıdış Konsepsiyasının icrası ilə bağlı gənclərin rolundan danışıb və onlara öz tövsiyələrini verib.

Milli Məclisin Səhiyyə komitəsinin sədri, Qərbi Azərbaycan İcması Ağsaqqallar Şurasının sədri akademik Əhliman Əmiraslanov konfransın əhəmiyyətinə toxunaraq azərbaycanlıların deportasiya tarixi barədə tələbələrə geniş məlumatların verilməsinin vacibliyini vurğulayıb.

Milli Məclisin deputatı Mehriban Vəliyeva "Sumqayıtlı gənc elçilər: Qərbi Azərbaycana qayıdış" konfransı çərçivəsində gənclərin ictimai-siyasi, sosial-mədəni sahədə fəaliyyətləri və vətəndaş mövqeyi barədə danışıb. Gəncləri tarixi həqiqətləri dərindən öyrənərək bu istiqamətdə həqiqətlərin dünyaya çatdırılmasında fəal olmağa çağırıb.

Konfransda Qərbi Azərbaycanla bağlı Ulu Öndər Heydər Əliyev və  Prezident İlham Əliyevin çıxışları və milli ideoloji hədəfləri özündə əks etdirən videoçarx nümayiş olunub. Şəhid polkovnik Vüqar Yusifovun qızı Ayan Yusifzadənin "Tarixi proseslərdə gənclərin rolu", SDU-nun III kurs tələbəsi Həsrət Suleymanovun "Qərbi Azərbaycan qan yaddaşında" və universitetin gənc müəllimi Gülçin Qasımovanın "Qərbi azərbaycanlıların qayıdış hüququ" mövzularında çıxışları dinlənilib. Universitetin çıxış edən pakistanlı tələbəsi Muhammad Adnan Gorgaje isə iki ölkə arasındakı dostluq əlaqələrinin hər zaman inkişaf edəcəyindən danışıb.

Müzakirədə Milli Məclisin deputatları Hikmət Babaoğlu, Məlahət İbrahimqızı, icma nümayəndələri, şura sədrləri, qonaq professorlar mövzular ətrafında çıxış edərək gənclərin suallarını cavablandırıblar.

Konfransda çıxış edən Sumqayıt Şəhər İcra Hakimiyyətinin başçısı Zakir Fərəcov soydaşlarımızın doğma yurdlarına qayıdışı istiqamətində Qərbi Azərbaycan İcması tərəfindən ölkəmizdə, o cümlədən Sumqayıtda görülən işlər haqqında söz açıb. Bildirib ki, icma qısa müddət ərzində indiki Ermənistan ərazisindən qovulmuş azərbaycanlıların hüquqlarının müdafiəsi istiqamətində böyük işlər həyata keçirir. Z.Fərəcov həmçinin Sumqayıtın "Gənclər paytaxtı" elan edildiyi ildə gənclərimizin milli ideoloji işin təbliği və təşviqində ön sıralarda olacaqlarına inamını ifadə edib. 

Akif ƏLİYEV,

"Azərbaycan"