Ümumdünya Meteorologiya Təşkilatının məlumatına görə, son 11 il müşahidələr tarixində ən isti illər olub.
Okeanlarımızdakı istilik də rekord səviyyədədir. Bu, hava sistemlərinə əlavə enerji və rütubət gətirir və yüksək təsirli ekstremal hadisələrin başvermə ehtimalını artırır.
AZƏRTAC xəbər verir ki, bu sözləri “Bakı İqlim Fəaliyyəti Həftəsi 2026” (BCAW2026) çərçivəsində keçirilən “Çoxsaylı təhlükələr üzrə erkən xəbərdarlıq sistemlərinə süni intellektin inteqrasiyasının üstünlükləri və çətinlikləri” mövzusunda panel sessiyada Ümumdünya Meteorologiya Təşkilatının (WMO) Baş katibi professor Selesta Saulo videomüraciətində deyib.
O bildirib ki, Nepaldakı dağıdıcı daşqınlar buzlaq və qar örtüyünün daxil olduğu kriosferin istiləşməsinin bir neçə saat ərzində fəlakətlərə səbəb ola biləcəyini acı şəkildə xatırladır. Bütün bunlar kifayət etmirmiş kimi, hazırda bütün dünyada çox güclü El-Nino hadisəsinin inkişaf etdiyini görürük: "Proqnozlaşdırdığımız təsirlərdən insanları və iqtisadiyyatları qorumaq imkanımız elmi bilikləri vaxtında, praktiki tədbirlərə çevirmək və bu tədbirləri hər yerdə insanlara çatdırmaq bacarığımızdan asılı olacaq. Bunun mümkün olması üçün iqlim həlləri arsenalımızda olan bütün vasitələrə ehtiyacımız var.
Süni intellekt bizə bu imkanları gücləndirmək üçün yeni fürsətlər yaradır. Süni intellekt proqnozları bir neçə dəqiqə ərzində hazırlamağa kömək edə bilər. O, proqnozların dəqiqliyini və düzgünlüyünü artırmağa, həftələrlə vaxt aparan hesablamaları isə bir neçə dəqiqə ərzində həyata keçirməyə imkan verə bilər.
Lakin həyatda hər şeydə olduğu kimi, texnologiyanın səmərəliliyi də onun qurulduğu təməllər qədərdir. Bu təməllərin əsasında isə həmişə insanlar, institutlar və imkanlar dayanır. Buna görə də bizə müşahidələri, fiziki modelləri və ekspert mülahizələrini tamamlayan məsuliyyətli süni intellekt lazımdır".
S.Saulo bildirib ki, çoxsaylı təhlükələrə qarşı erkən xəbərdarlıq sistemləri, iqlim məlumatları xidmətləri və müşahidə şəbəkələri mühüm ictimai infrastrukturdur.
Onlar insanları qoruyur, iqtisadi inkişafı dəstəkləyir və icmalara dəyişən iqlimə hazırlaşmağa kömək edir.
Süni intellekt böyük həcmdə məlumatları insanların əməli addımlar ata biləcəyi informasiyaya çevirərək həmin infrastrukturun imkanlarını daha da gücləndirə bilər.
"Himalaylardan Qafqazadək buzlaqların geri çəkilməsinin davam etdiyini gördüyümüz bir vaxtda, süni intellektin bu böyük riski buzlaqların monitorinqi və erkən xəbərdarlıq sistemləri sahəsində konkret irəliləyişə çevirməyə necə kömək edə biləcəyini nümayiş etdirmək imkanımız var. Bakı İqlim Fəaliyyəti Həftəsi süni intellektin üstünlüklərinin hər kəs üçün əlçatan olmasını təmin etmək baxımından mühüm olan beynəlxalq əməkdaşlıq, investisiya və potensialın inkişafı imkanlarından yararlanacağımız platforma olmalıdır. Müzakirələrdən fəaliyyətə, Bakıdan Antalyaya və COP31-ə doğru irəlilədikcə, əldə etdiyiniz tərəqqini dəstəkləməyi səbirsizliklə gözləyirəm. Çünki itirəcək bir dəqiqəmiz belə yoxdur.
Dünyanın hər yerində insanlar bizdən daha yaxşı nəticələr gözləyirlər", - deyə S.Saulo bildirib.
jpg_1790976482.jpg)
