Türkiyənin xarici işlər naziri Hakan Fidan Rusiya xarici işlər naziri Sergey Lavrovun dəvəti ilə iyunun 15-17-də Moskvaya işgüzar səfər edəcək.
AZƏRTAC Rusiya Federasiyasının Xarici İşlər Nazirliyinə istinadla xəbər verir ki, danışıqlar zamanı ikitərəfli və beynəlxalq gündəliyə aid geniş məsələlərin müzakirəsi planlaşdırılır.
Yaxın Şərqdəki vəziyyətə, Fələstin probleminin həlli perspektivlərinə, Qara dəniz bölgəsindəki vəziyyətin inkişafına, eləcə də təhlükəsiz gəmiçiliyin təmin edilməsi məsələlərinə xüsusi diqqət yetiriləcək.
Cənubi Qafqazda əməkdaşlığın genişləndirilməsi perspektivlərinə, o cümlədən nəqliyyat və kommunikasiya xətlərinin açılmasına, eləcə də regionun münaqişədən sonrakı bərpasına xüsusi diqqətin yetirilməsi planlaşdırılır.
Rusiya Federasiyası Xarici İşlər Nazirliyi qeyd edib ki, Rusiya və Türkiyə dinc və proqnozlaşdırıla bilən Cənubi Qafqazda maraqlıdır və “3+3” Regional Əməkdaşlıq Platformasına qarşılıqlı fəaliyyət mexanizmlərindən biri kimi baxır.
Sergey Lavrov və Hakan Fidan həmçinin Suriyadakı vəziyyəti, Liviya üzrə qarşılıqlı fəaliyyət məsələlərini, Mərkəzi Asiyada inteqrasiya proseslərini, eləcə də Rusiya-Türkiyə ticarət-iqtisadi əməkdaşlığının inkişafını müzakirə edəcəklər.
Bundan əlavə, danışıqların gündəliyinə “Akkuyu” Atom Elektrik Stansiyasının tikintisinin gedişi, “Mavi Axın” və “Türk Axını” qaz kəmərlərinin istismarı, eləcə də Türkiyədəki Rusiya turistlərinin təhlükəsizliyinin təmin edilməsi məsələləri daxildir.
Rusiya Xarici İşlər Nazirliyi vurğulayıb ki, bu görüş Rusiya-Türkiyə siyasi dialoqunun yüksək səviyyəsini təsdiqləməli və qarşılıqlı maraq doğuran məsələlər üzrə əməkdaşlığın daha da inkişaf etdirilməsinə kömək etməlidir.
677jpg_1781134810.jpg)
jpg_1781515609.jpg)
