İyulun 13-də IV Şuşa Qlobal Media Forumu çərçivəsində “Rəqəmsal platformalarda təhlükəsiz informasiya mühiti: Müasir çağırışlar və vacib həllər” mövzusunda panel müzakirəsi keçirilib.
AZƏRTAC xəbər verir ki, paneldə Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev, müxtəlif ölkələrdən media rəhbərləri, rəqəmsal platformalar üzrə ekspertlər, yerli və xarici media nümayəndələri iştirak ediblər.
Milli Kibertəhlükəsizlik Agentliyinin İdarə Heyətinin sədri Fərid Zeynalov bildirib ki, indiki dövrdə artıq informasiya təhlükəsizliyi yalnız texniki məsələ deyil, bu eyni zamanda, dövlətlərin milli təhlükəsizlik komponenti, ictimai sabitliyin və inkişafın ayrılmaz hissəsinə çevrilib.
"Bu gün bütün dünyada olduğu kimi, Azərbaycanda da uşaqların sosial şəbəkələrdə təhlükələrdən qorunması üçün tədbirlər görülür. "Media haqqında”, “İnformasiya, informasiyalaşdırma və informasiyanın mühafizəsi" və “Uşaqların zərərli informasiyadan qorunması” haqqında qanunlarda bir sıra dəyişiklik edilir. Proses artıq son mərhələdədir. Qanunvericiliyin məqsədi məhdudlaşdırma tədbirləri keçirmək deyil, uşaqlar üçün daha şəffaf və təhlükəsiz rəqəmsal mühit yaratmaqdır", - deyə F.Zeynalov diqqətə çatdırıb.
O bildirib ki, bu qanunvericiliyin dəyişiklik mərhələsində bir sıra mexanizmlər nəzərdə tutulub. Belə ki, 16 yaşına çatmamış uşaqların ümumiyyətlə rəqəmsal platformalarda hesab yaratmaları qadağan edilir. 16–18 yaşarası yeniyetmələrin qeydiyyatdan keçməsi ilə bağlı onların valideynlərinin razılığı tələb olunur.
Sosial media üzrə təlimçi və tədqiqatçı Karen Sazerlend bildirib ki, süni intellekt texnologiyalarının sürətli inkişafı informasiya mühitinə yeni imkanlarla yanaşı, ciddi risklər də gətirib. Onun sözlərinə görə, “deepfake” texnologiyalarının geniş yayılması informasiyanın doğruluğunun yoxlanılmasını daha da vacib edir. Bu baxımdan media savadlılığının gücləndirilməsi və etibarlı mənbələrdən istifadənin təşviqi müasir dövrün əsas çağırışlarından biridir.
“TikTok”un Şərqi Avropa üzrə ictimai siyasət və dövlət qurumları ilə əlaqələr direktoru Diana Ryan platformanın istifadəçilər üçün təhlükəsiz rəqəmsal mühitin yaradılmasını əsas prioritetlərdən biri hesab etdiyini bildirib. O qeyd edib ki, zərərli məzmunun aşkarlanması və silinməsi istiqamətində həm süni intellekt texnologiyalarından, həm də peşəkar moderatorlardan istifadə olunur. Diana Ryan Azərbaycanın aidiyyəti dövlət qurumları ilə əməkdaşlığın uğurla davam etdiyini də vurğulayıb.
“LinkedIn” şirkətinin ictimai sektor, səhiyyə sahəsi və qeyri-kommersiya satışı üzrə rəhbəri Şeymus Klensi isə bildirib ki, peşəkar sosial şəbəkələrdə etibarlı informasiya mühitinin qorunması şəffaflıq, məsuliyyət və istifadəçi etimadı üzərində qurulur. Onun sözlərinə görə, “LinkedIn” hökumətlər, təhsil müəssisələri və biznes strukturları arasında peşəkar əməkdaşlığın genişlənməsinə, etibarlı informasiya mübadiləsinə və insan kapitalının inkişafına töhfə verir.
"Platformada qaydaların pozulmasına qarşı operativ nəzarət mexanizmləri tətbiq olunur. Bu məqsədlə fəaliyyət göstərən xüsusi etibar və təhlükəsizlik komandamız zərərli məzmunu operativ şəkildə aşkarlayır, qiymətləndirir və platformadan kənarlaşdırır. Beləliklə, istifadəçilər üçün daha təhlükəsiz rəqəmsal mühitin formalaşdırılması təmin edilir", - deyə o vurğulayıb.
Panel müzakirəsində, həmçinin rəqəmsal platformalarda təhlükəsiz informasiya mühitinin formalaşdırılması, süni intellekt dövründə dezinformasiyaya qarşı mübarizə, uşaqların onlayn təhlükəsizliyinin təmin edilməsi, beynəlxalq əməkdaşlığın genişləndirilməsi və rəqəmsal platformaların məsuliyyətinin artırılması istiqamətində fikir mübadiləsi aparılıb. İştirakçılar bu sahədə hüquqi mexanizmlərin təkmilləşdirilməsi ilə yanaşı, texnoloji yeniliklərin və media savadlılığının da mühüm rol oynadığını bildiriblər.
jpeg_1787655879.jpeg)
