Dünya təcrübəsi göstərir ki, dövlətin qüdrətini artıran şərtlər sırasında iqtisadi yüksəliş və güclü ordu daha böyük əhəmiyyətə malikdir. Bu gün hamımız qürur və iftixarla  deyə bilərik ki, ölkəmiz həm iqtisadi sahədə yüksəliş əldə edib, həm də ordu quruculuğu prosesində çox böyük uğurlar qazanıb. 
Zəfərləri ilə daim qürur duyduğumuz Azərbaycan Silahlı Qüvvələrinin yaranmasından 106 il keçir. Şərqdə ilk demokratik respublika olan Azərbaycan Xalq Cümhuriyyəti xalqımızın dövlətçilik tarixində özünəməxsus rolu və miras qoyduğu yeni milli dəyərləri ilə tarixləşdi. 1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə ilk müntəzəm hərbi hissə - Əlahiddə Azərbaycan Korpusu yaradıldı. Hökumət tərəfindən qarşıya 25 min nəfərlik ordu yaratmaq vəzifəsi qoyuldu. Həmin il avqustun 1-də Azərbaycanın Hərb Nazirliyi təsis olundu. İlk nazir Xosrov bəy Sultanov təyin edildi. Sonra - dekabrın 25-də general Səməd bəy Mehmandarov hərb naziri, general-leytenant Əliağa Şıxlinski nazir müavini təyin olundular.
1920-ci ilin aprelində Azərbaycan Xalq Cümhuriyyəti süqut etdikdən sonra bolşevik hökuməti Milli Ordunu ləğv etdi. Onun rəhbərlərinin əksəriyyəti, o cümlədən 15 general Nargin adasında güllələndi, bir çox vətənpərvər hərbçi repressiyaya məruz qaldılar. Azərbaycanın yeni ordusunun yaradılmasına 1991-ci ildə dövlət müstəqilliyinin bərpasından sonra başlandı. Həmin il oktyabrın 9-da Milli Ordunun yaradılması haqqında Azərbaycan Respublikasının Ali Soveti qanun qəbul etdi. 
Lakin müstəqilliyin ilk illərində ölkəmizə rəhbərlik edənlər Ermənistanın torpaqlarımızı işğal etdiyi bir vaxtda ordu quruculuğu kimi vacib və məsuliyyətli vəzifənin öhdəsindən gələ bilmədilər. Bundan istifadə edən düşmənin torpaqlarımıza təcavüzü getdikcə daha geniş miqyas aldı. Azərbaycan müstəqilliyin itirilməsi təhlükəsi ilə üz-üzə qaldı.
Ümummilli Lider Heydər Əliyev xalqın təkidli tələbi ilə hakimiyyətə gəldikdən sonra həm Prezident, həm də Ali Baş Komandan olaraq, ordunun qüdrətli olmasına böyük diqqət yönəltdi. Ordu dövlətin gündəlik qayğısı ilə əhatə olundu, bu istiqamətdə dövlətin bütün orqanlarının cavabdehliyi artırıldı. Heydər Əliyevin 22 may 1998-ci il tarixli fərmanına əsasən, 1918-ci ildə Əlahiddə Azərbaycan Korpusunun yarandığı gün - 26 İyun Azərbaycan Respublikası Silahlı Qüvvələri Günü elan edildi. 
Müstəqil Azərbaycanda ordu quruculuğu prosesi Prezident İlham Əliyevin hakimiyyəti dövründə keyfiyyətcə yeni mərhələyə qədəm qoydu. Ulu Öndərin ordu quruculuğu siyasətini uğurla davam etdirən və daha da zənginləşdirən Prezident, Ali Baş Komandan İlham Əliyevin diqqət və qayğısı sayəsində hərbçilərin peşəkarlığının artırılması, şəxsi heyətin döyüş ruhunun və mənəvi-psixoloji hazırlığının yüksəldilməsi, Silahlı Qüvvələrimizin müasir silah və texnika ilə təchizatı istiqamətində davamlı və uğurlu addımlar atıldı. Bunun sayəsində Azərbaycan Silahlı Qüvvələri qısa müddət ərzində Cənubi Qafqazın ən güclü  ordusuna çevrildi.
Beynəlxalq ictimaiyyət Azərbaycan Ordusunun gücünü, qüdrətini 2016-cı ilin aprelində gördü. Ermənistan ordusunun təxribatlarına cavab verən əsgər və zabitlərimiz sürətli əks-hücum əməliyyatı ilə düşməni ağır məğlubiyyətə uğratdı. Qazanılan qələbə nəticəsində Füzuli, Cəbrayıl və Ağdərə rayonlarının işğal altındakı xeyli ərazisi azad olundu. Azərbaycan Ordusu dördgünlük Aprel döyüşləri ilə xalqımıza ilk qələbə sevincini yaşatdı.
2020-ci il sentyabrın 27-də erməni təxribatı nəticəsində başlayan İkinci Qarabağ müharibəsində Silahlı Qüvvələrimizin qazandığı şanlı Qələbə hərb tariximizə qızıl hərflərlə həkk olundu. Müzəffər Ali Baş Komandan İlham Əliyevin  rəhbərliyi ilə Azərbaycan Ordusu düşmənə sarsıdıcı zərbələr vuraraq 44 gün ərzində 5 şəhər, 4 qəsəbə və 300-dək kəndi erməni qəsbkarlarından azad etdi. Azərbaycanın illərdən bəri pozulan ərazi bütövlüyü bərpa olundu. 
Dövlətimizin başçısı 2021-ci il iyunun 26-da Silahlı Qüvvələr Günü münasibətilə Azərbaycan Ordusunun rəhbər və şəxsi heyətinin bir qrupu ilə görüşündə İkinci Qarabağ müharibəsində qazanılan uğurlardan danışarkən demişdir: "Hər il bu bayramı qeyd edərkən biz özümüzə söz verirdik ki, nəyin bahasına olursa-olsun, doğma torpaqlarımızı işğalçılardan azad edəcəyik. Bu gün qürur hissi ilə deyə bilərəm ki, biz Silahlı Qüvvələr Gününü müzəffər Ordu kimi, qalib xalq kimi qeyd edirik. Bu, tarixi nailiyyətdir. Azərbaycan xalqının çoxəsrlik tarixində buna bənzər parlaq Zəfər olmamışdır. Biz bütün gücümüzü səfərbər edərək düşmənə sarsıdıcı zərbələr endirib, düşməni məğlub etdik, tarixi ədaləti və ölkəmizin ərazi bütövlüyünü bərpa etdik".
Təbiidir ki, Azərbaycan xalqının, dövlətinin və ordusunun sarsılmaz birliyi nəticəsində qazanılmış bu şanlı qələbə uzun illər ordu quruculuğu istiqamətində aparılan islahatların nəticəsidir. Azərbaycanın qazandığı bu qələbə nəyi, necə və nə zaman etməyi gözəl bilən Müzəffər Ali Baş Komandan İlham Əliyevin uğurlu siyasətinin, güclü iradəsinin və sarsılmaz qətiyyətinin nəticəsidir. 
Hər bir xalqın xilaskar ordusu, qəhrəman silahlı qüvvələri ilə öyünməyə, qürur duymağa mənəvi haqqı var. Azərbaycan xalqı da doğma ordusu ilə öyünüb fəxr edir. Modernləşdirilən, ən müasir texnika ilə təmin olunan Azərbaycan Ordusunun gücü, qüdrəti bu gün beynəlxalq səviyyədə də etiraf edilir. Silahlı Qüvvələrimiz indi dünyanın  güclü orduları sırasındadır. Bu isə o deməkdir ki, vətənimiz də, dincliyimiz və əmin-amanlığımız da etibarlı qorunur.
.  
Vahid MƏHƏRRƏMOV,
"Azərbaycan"