Kalininqrad vilayətinə və ya Rusiyanın digər bölgəsinə birbaşa hücum olacağı təqdirdə ölkənin sərəncamında olan bütün silahlardan istifadə məsələsi qaçılmaz olaraq gündəmə gələcək.
Bunu Rusiya Prezidenti Vladimir Putin “Valday” Beynəlxalq Diskussiya Klubunun XXIII illik iclasının plenar sessiyasında çıxışı zamanı deyib.
AZƏRTAC xəbər verir ki, o, Rusiya Xarici İşlər Nazirliyinin Kalininqrad vilayəti ətrafındakı vəziyyətlə bağlı bəyanat və məktublarının qorxutmaq cəhdi olmadığını vurğulayıb.
Bununla yanaşı, Rusiya Prezidenti vurğulayıb ki, xarici siyasət qurumunun məktublarında nüvə silahından istifadə məsələsindən birbaşa söhbət getməyib. Onun sözlərinə görə, söhbət Moskvanın sərəncamında olan bütün güc və vasitələrdən istifadə edilməsindən gedib və hansı vasitələrdən istifadə olunacağına dair qərar isə vəziyyətdən asılı olaraq qəbul ediləcək.
V.Putin, həmçinin bildirib ki, Rusiya Avropada heç kimi təhdid etmir. Bununla yanaşı, o, avropalı siyasətçilərin Rusiya ilə mümkün müharibə barədə açıqlamalarını, Baltik dənizində hərbi təlimlərin keçirilməsini və Rusiya gəmilərinin saxlanılmasına cəhdləri eskalasiya kimi qiymətləndirib.
Rusiyanın hərbi potensialından danışan V.Putin qeyd edib ki, birbaşa təhlükə yaranacağı təqdirdə ölkə özünün “rəqabət üstünlüklərindən” istifadə edəcək: “Bu gün Rusiyada olan silahlar heç bir ölkədə yoxdur”.
V.Putin ayrıca olaraq nüvə silahından istifadə risklərinə toxunub. Onun fikrincə, bu gün dünyanın aparıcı dövlətlərinin sərəncamında olan və Yer kürəsi üçün fəlakətli nəticələrə səbəb ola biləcək silahların heç vaxt istifadə edilməyəcəyini tam əminliklə söyləmək mümkün deyil.
“Biz bunu nəzərə almalı və qarşısını almalıyıq”, – deyə Rusiya Prezidenti vurğulayıb.
