Prezident İlham Əliyev Ağdam Muğam Mərkəzinin açılışında çıxışı zamanı "Ən azı yaşadığımız bölgədə bizimlə bu gün hesablaşmayan sabah peşman olur" deməklə həm də Azərbaycanın regionda hansı mövqeyə sahib olduğunu dəqiq ifadə etdi. Bəli, Azərbaycan regionun aparıcı və söz sahibi olan dövlətidir. Bakı ilə hesablaşmaq istəməyənlərə burada yer yoxdur.
Nəzər yetirsək görərik ki, Cənubi Qafqazı əhatə etməklə, qitələri birləşdirən bütün aparıcı kommunikasiyaların reallaşmasının mərkəzində dayanan məhz Azərbaycandır. Başqa cür desək, bu kommunikasiyalar respublikamızın təşəbbüsləri və Bakının moderatorluğu ilə həyata vəsiqə alıb. Bakı-Tbilisi-Ceyhan, Bakı-Tbilisi-Qars, "Cənub qaz dəhlizi" kimi nəhəng infrastrukturların ərsəyə gətirilməsinin əsas səbəbi Azərbaycan dövlətinin iradəsi və qətiyyətidir.
Bunlardan yararlananlar isə yalnız Azərbaycan deyil, həm də Gürcüstandır, Türkiyədir, Avropa və Orta Asiya dövlətləridir. Respublikamızdan keçən nəqliyyat dəhlizləri Şərqlə Qərbi, Şimalla Cənubu bir-birinə daha yaxın edir, dövlətlərarası iqtisadi əməkdaşlığı dərinləşdirir. Azərbaycanın enerji siyasəti isə dost dövlətlərin, habelə Avropa İttifaqına üzv ölkələrin milli maraqlarını da qoruyur.
Azərbaycanın təşəbbüsləri ilə ərsəyə gələn bu infrastrukturlardan yararlana bilməyən isə Ermənistandır. Çünki həyata keçirdiyi işğal siyasətinə görə Azərbaycan bu dövləti bütün layihələrdən kənarda saxlayıb, regional və transkontinental inteqrasiyalardan təcrid edib. Azərbaycanla hesablaşmaq istəməyən və bunun ağır nəticələrini yaşayan Ermənistan bu gün də dalanda qalıb. Azərbaycanın iradəsi xaricində Ermənistanın bu vəziyyətdən çıxması mümkün deyil.
Yaxud götürək Ermənistanın böyük bacısı Fransanı. Vətən müharibəsi günlərindən özünü tam ifşa edən və maskası yırtılan Parisə də Cənubi Qafqazda yer yoxdur. Fransanın regiondan uzaqlaşdırılması həm də bu ölkənin regionla bağlı qeyri-sağlam və qeyri-səmimi niyyətlərindən irəli gəlir. Tarixi müstəmləkəçilik cinayətləri ilə zəngin olan bu dövlətin regionla bağlı bir sıra maraqları sağlam və sivil prinsiplərə söykənmir. Ən yaxşı halda Fransa öz lövbərini Ermənistana sala bilər ki, bu da geosiyasi və geostrateji baxımdan heç bir əhəmiyyət kəsb etmir. Beləliklə, Afrikadan qovulan Fransanın Cənubi Qafqazla bağlı maraqları da Azərbaycan tərəfindən iflasa uğradılıb. Amma Azərbaycan Fransanı yalnız Cənubi Qafqazda deyil, həm də qlobal səviyyədə sözün bütün mənalarında peşman edir.
Regionda Azərbaycanla hesablaşmayan həqiqətən də peşman olur. Bunu Avropa İttifaqının davranışlarından da görmək mümkündür. Avropa İttifaqının Ermənistan-Azərbaycan sərhədinin Ermənistan tərəfində müşahidəçi missiyası saxlamaqla həyata keçirdiyi təxribatçı fəaliyyətin münasibətlərə xələl gətirməsi faktdır. Adı mülki olsa da bu, kəşfiyyat missiyasıdır. Çünki bu missiyanın əməkdaşları "binokl diplomatiyası" yolu ilə Azərbaycan hərbçilərinin mövqeləri, bölmələrimizin dislokasiya yerləri haqqında kəşfiyyat məlumatları toplayırlar.
Lakin dəyişən dünya nizamı, siyasi qütblər arasındakı gərginliklər Avropa İttifaqını da yürütdüyü yanlış siyasətdən imtinaya vadar edir. Bu baxımdan indi özünün iqtisadi təhlükəsizliyi ətrafında daha çox düşünməyə məcbur olan Avropa İttifaqı anlayır ki, Azərbaycanla tərəfdaşlıq olduqca mühümdür. Aprel ayında Avropa İttifaqının Xarici siyasət və təhlükəsizlik məsələləri üzrə ali nümayəndəsi, Avropa Komissiyasının vitse-prezidenti Kaya Kallasın Azərbaycana səfəri də bu məqsədlərdən irəli gəlirdi.
Azərbaycan müstəqil, qətiyyətli və beynəlxalq hüquq prinsiplərinə əsaslanan siyasəti olan dövlətdir. Respublikamıza regionda və dünyada hörmət və nüfuz qazandıran əsas amillərdən biri məhz budur. Azərbaycana ehtiram gətirən digər mühüm amil torpaqlarını döyüş yolu ilə işğaldan azad etməsidir. Belə bir dövlətlə isə, əlbəttə ki, hesablaşmaq vacibdir.
Rəşad CƏFƏRLİ,
"Azərbaycan"
jpeg_1765897678.jpeg)
