Fransanın maliyyə naziri Brüno Le Mer bildirib ki, parlament seçkilərində millətçilər, yaxud solçular qalib gələrsə, ölkə maliyyə böhranı riski ilə üzləşəcək. Belə ki, onlar dövlət xərclərini artırmağı planlaşdırıblar.
Öz növbəsində, Parisdəki Amundi aktivləri üzrə baş menecer Ameli Derambur qeyd edib ki, siyasi risklərin Fransanın aktivlərinə mənfi təsir göstərməsi qaçılmazdır. Maliyyə bazarları "Milli Birlik" Partiyasının hakimiyyətə gəlməsinin nəticələrini böyük maliyyə itkiləri, milliləşdirmə riskləri və digər fəsadlarla qiymətləndiriblər. 
Avro 0,4 faiz ucuzlaşaraq 6 həftədən çox müddətdə ən aşağı səviyyəyə düşüb. Analitiklər bildiriblər ki, Avropa bazarlarında eniş millətçi partiyaların müxtəlif ölkələrdə uğur əldə etməsindən sonra baş verib.
Fransada 6-9 iyun tarixlərində keçirilən AP seçkilərində Marin Le Penin rəhbərlik etdiyi "Milli Birlik" partiyası səslərin 31,8 faizini qazanıb. Makronun "İntibah" partiyası isə seçicilərin cəmi 15,2 faizi tərəfindən dəstəklənib. 
Bundan sonra Fransa lideri Milli Assambleyanın buraxıldığını və növbədənkənar parlament seçkilərinin keçiriləcəyini bəyan edib.
Marin Le Pen isə vurğulayıb ki, əgər insanlar onlara güvənərsə, partiya Fransada hakimiyyəti ələ keçirməyə hazırdır.
"Europe 1" radiostansiyası iyunun 30-da və iyulun 7-də keçiriləcək parlament seçkilərində millətçilərin qələbə qazanacağı halda Fransa prezidentinin öz ətrafı ilə dövlət başçısı vəzifəsindən istefa verməsinin mümkünlüyü ilə bağlı müzakirələr apardığını bildirib. 
Eyni zamanda qeyd edilib ki, belə bir addım Makronun üstünlük verdiyi variant deyil, lakin bu perspektiv kampaniyada qarşıdan gələn seçkilərin dramatikləşdirilməsi  rolunu oynaya bilər.
Bundan əlavə, Böyük Britaniyada çıxan "Financial Times" qəzeti yazıb ki, Fransada dörd sol partiya parlament seçkilərində vahid namizədlər irəli sürmək üçün birləşməyə hazırdır. Proqnozlara əsasən, bu halda Makronun ikinci tura çıxmaq şansı daha da azalacaq. 
"Bloomberg" agentliyinin verdiyi xəbərə görə, Fransada investorlar qarşıdan gələn parlament seçkiləri və onların nəticələrindən narahatdırlar. Çünki prezident Emmanuel Makronun siyasəti ölkə iqtisadiyyatını yoxsullaşdırır. 

Rizvan CƏFƏROV,
"Azərbaycan"