İƏT Mədəniyyət Festivalı yalnız mədəniyyət nümayişi deyil, həm də ortaq kimliyimizin, tarixi birliyimizin və ruhani dəyərlərimizin dünya səhnəsində təcəssümüdür. İslam dünyasının mədəni irsi, milyonlarla insanın yaddaşını, tarixi varlığını və mədəni sabitliyini daşıyan müqəddəs bir mirasdır.
AZƏRTAC xəbər verir ki, bu sözləri Bakıda keçirilən “İƏT Mədəniyyət Festivalı: Bakı Yaradıcı Həftə-2025”in açılış mərasimində Fələstin Dövlətinin mədəniyyət naziri İmadeddin Abdullah Salim Hamdan deyib.
Nazir qeyd edib ki, Fələstinin mədəniyyət siyasəti, məhz bu irsin qorunması, nəsillər arasında ötürülməsi və müasir yaradıcılıq formaları ilə zənginləşdirilməsinə yönəlib. “Bu festival, yaradıcı insanlar üçün yeni dialoq məkanı, mədəni platforma və inteqrasiya mühiti yaradır. Burada paylaşdığımız fikirlər, ideyalar və layihələr gələcəyin mədəni arxitekturasını formalaşdırmağa xidmət edir. Biz inanırıq ki, mədəniyyət xalqlar arasında ən güclü körpüdür, çünki dilindən, coğrafiyasından və siyasi çərçivəsindən asılı olmayaraq insan ruhunun ən saf təzahürünü daşıyır.
Fələstin olaraq, mədəni irsimizi qorumaqla yanaşı, teatr, kino, musiqi, memarlıq və incəsənət sahələrində yeni yaradıcılıq istiqamətlərinin inkişafını da prioritet hesab edirik. Bu məqsədlə beynəlxalq tərəfdaşlıq imkanlarının genişləndirilməsi, gənclərin yaradıcılıq mühitinə cəlb edilməsi və innovativ mədəniyyət platformalarının qurulması əsas fəaliyyət istiqamətlərimizdəndir”, - deyə İmadeddin Abdullah Salim Hamdan əlavə edib.
Nazir sonda Fələstin adından Azərbaycan dövlətinə, təşkilat komitəsinə, İƏT-ə və bütün iştirakçı ölkələrə dərin minnətdarlığını bildirib, festivalın uğurlu olacağına və gələcək mədəni təşəbbüslərə güclü zəmin yaradacağına əminliyini ifadə edib.
