Müharibənin ildönümü bu ölkədə  depressiya, çaşqınlıq və ümidsizlik şəraitində keçən matəm günü kimi xatırlanır

Vətən müharibəsinin başlamasının 4-cü ildönümü Azərbaycanda xüsusi qeyd edilməkdədir. Çünki işğal edilmiş ərazilərimizin azad edilməsi uğrunda 44 gün davam edən savaş respublikamızın qeyd-şərtsiz qələbəsi ilə başa çatdı.  Bu müharibədə qazandığımız qələbə, ədalətin zəfər çalması ermənilər üçün unudulmaz dərs oldu. 

Azərbaycan üçün 44 günlük müharibə qürur mənbəyi olduğu halda, Ermənistanda əsl məyusluq hökm sürür.  Bu ölkədə müharibənin başlanmasının ildönümü depressiya, çaşqınlıq, ümidsizlik şəraitində keçən matəm günü kimi xatırlanmaqdadır. 

Məsələn, erməni politoloq Karen Vardanyan olduqca pessimistdir. O qeyd edir ki, Azərbaycan hər zaman istəyinə nail olmaq gücündədir: "Azərbaycanlılar  öz proqramlarını həyata keçiriblər. Yəni Qarabağı azad ediblər. İndi isə onların qarşısında daha böyük proqramı həyata keçirmək durur".

O bildirib ki, indi Azərbaycanın qarşısında dayanan vəzifə Zəngəzuru, Basarkeçəri, İrəvanı, Qarakilsəni və digər əraziləri azad etməkdir: "Hazırda Azərbaycanda növbəti nəsli buna hazırlayırlar. Çünki bilirlər ki, xoşluqla heç kim bu əraziləri onlara qaytarmayacaq. Əgər onlar Qarabağı azad ediblərsə, onda niyə sadaladığım torpaqları da geri qaytarmasınlar".

Erməni siyasi şərhçi Levon Naumyan deyib ki, Ermənistan öz məğlubiyyətinin başlanmasının ildönümünü tamam başqa halda qarşılayır: "Dörd il ötməsinə baxmayaraq, Ermənistan İkinci Qarabağ müharibəsinin nəticələrindən sonra hələ özünə gələ bilməyib. Onun özünə gəlməsi mümkün də deyil. Respublika yeni reallıqla barışmalı olacaq. Lakin təəssüf ki, Ermənistan beynəlxalq cəhdlərini davam etdirir, ənənəyə görə güclü olduğu sahələrdə, yəni intriqalar və beynəlxalq təzyiq sahələrində qarşıdurmanı davam etdirməyə çalışır. Ermənistan öz yaralarını yalayır və heç kəs ondan hər hansı qətiyyətli hərəkət və igidlik gözləmir".

 "4rd.am" nəşrinin "youtube" platformasında yayımlanan reportajda erməni xalqının ağır günlər yaşadığı qeyd olunub. "Ermənistanda İkinci Qarabağ müharibəsinin dördilliyi ilə bağlı nə düşünürlər?" reportajında ermənilər çox ağır məğlubiyyətin yaşandığını, bunun ölkə üçün dəhşətli olduğunu ifadə ediblər. Onlar bunu xüsusi bildirirlər ki, 44 günlük müharibə Ermənistanın rüsvayçılığıdır.

Digər erməni isə məğlubiyyəti ümumi faciə adlandırıb: "Qarabağın itirilməsi bizi çox ağır sınaqlara düçar etdi. Azərbaycan necə deyirdi, elə də etdi. Bizimkilər rusları düşünürdü, Rusiya isə bunu etmədi, öz müttəfiqinin hayına yetmədi. Çox zaman keçməlidir, ancaq zaman da bu ağrını sağalda bilməz". 

Ümumiyyətlə, reallıq ondan ibarətdir ki, müharibədəki məğlubiyyət ermənilərə böyük dərd olub. Aydın görünür ki, Ermənistan və onun xalqı işğal siyasətinin faciəsini yaşayır. Güclü Azərbaycan dövləti qarşısında Ermənistanın müharibə və postmüharibə dövründəki məğlubiyyəti hayları dərin fəlakətə sürükləyib. 

Elçin CƏFƏROV,

"Azərbaycan"