Dövlət Sərhəd Xidmətinin (DSX) Xidməti Heyvanlar Təlimatçılarının Hazırlığı mərkəzində hərbi hissələr arasında xidməti it təlimatçıları və bələdçilərinin “Sərhədçilərin dostu” adlı dördüncü kinoloji yarışlar keçirilib.
DSX-nin mətbuat mərkəzindən AZƏRTAC-a bildiriblər ki, kinoloji yarışlara Xidməti Heyvanlar Təlimatçılarının Hazırlığı mərkəzinin, Sərhəd Qoşunlarının hərbi hissələrinin, Sərhəd Nəzarətinin sərhəd nəzarəti şöbələrinin kinoloq-mütəxəssisləri cəlb olunublar.
Kinoloji yarışlar üç müxtəlif istiqamətdə - mina axtarışı, narkotik maddələrin axtarışı və iz axtarışı üzrə keçirilib. Yarışların kecirilməsində məqsəd xidməti it təlimatçıları və bələdçilərinin peşəkar hazırlığını inkişaf etdirmək, dövlət sərhədinin mühafizəsində xidməti itlərlə sərhəd pozucularının axtarışı və yaxalanması, sərhəd nəzarəti məntəqələrində narkotik maddələrin axtarışı, həmçinin minatəmizləmə əməliyyatlarında peşəkarlıq səviyyəsinin artırılması, ən yaxşı praktiki vərdişlərə malik kinoloq-mütəxəssisləri və yüksək iş qabiliyyəti olan xidməti itləri müəyyənləşdirmək olub.
Tədbirdə xüsusi təlim keçmiş xidməti itlərlə nəqliyyat vasitələrində, əl çantalarında narkotik maddələrin axtarışı, sərhəd pozucusunun izlərlə təqib olunaraq yaxalanması, ərazidə tank və piyada əleyhinə minaların aşkarlanması üzrə tapşırıqlar yerinə yetirilib.
Yarışların qaliblərinə kubok, diplom və pul mükafatları təqdim olunub.
Tədbirin rəsmi hissəsi başa çatdıqdan sonra kinoloq-mütəxəssislər tərəfindən xidməti itlərlə nümunəvi çıxışlar nümayış etdirilib.
jpg_1765992511.jpg)
jpg_1765990345.jpg)
