Macarıstanın paytaxtı Budapeşt şəhərində Azərbaycanın 44 günlük Vətən müharibəsindəki Qələbəsi münasibətilə gəmidə Zəfər Günü adlı tədbir keçirilib.
AZƏRTAC xəbər verir ki, Budapeştdə yerləşən Azərbaycan Evinin təşkilatçılığı və Azərbaycan Diasporuna Dəstək Fondunun yardımı ilə keçirilən tədbirdə Macarıstanda yaşayan soydaşlarımız, Macarıstan Respublikasındakı səfirliyimizin əməkdaşları, yerli QHT və media nümayəndələri, Macarıstanda fəaliyyət göstərən beynəlxalq təşkilatların nümayəndələri iştirak ediblər.
Tədbirin rəsmi hissəsində 44 günlük Vətən müharibəsində torpaqlarımızın azadlığı uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib, ardınca isə Azərbaycan və Macarıstanın Dövlət himnləri səsləndirilib.
Budapeştdə yerləşən Azərbaycan Evinin rəhbəri İbrahim Səfərli çıxış edərək, 44 günlük Vətən müharibəsində Ali Baş Komandan İlham Əliyevin rəhbərliyi ilə Ordumuzun qəhrəmanlıqları və Zəfər Gününün önəmi haqqında tədbir iştirakçılarına məlumat verib.
Daha sonra Diasporla İş üzrə Dövlət Komitəsinin əməkdaşı Gülmira Vəliyeva çıxış edərək, komitə rəhbərliyinin təbriklərini tədbir iştirakçılarına çatdırıb.
Tədbirin bədii hissəsində Günel Ələkbərova pianoda, Elnur Namazov isə gitarada bir-birindən fərqli əsərlər ifa ediblər.
Bədii hissədən sonra sahildə dayanan gəmi Dunay çayı boyu hərəkət etməyə başlamış və qonaqlar üçün xüsusi hazırlanmış ziyafət təqdim edilib.
Bundan əlavə tədbir zamanı Budapeştdəki Azərbaycan Evinin təşkilatçılığı ilə Vətən müharibəsində şəhid və qazi olmuş həmvətənlərimizin ailə üzvlərinə dəstək olmaq məqsədilə (“YAŞAT” Fonduna) qonaqlar tərəfindən müxtəlif ianələr də yığılıb.
jpg_1765992511.jpg)
jpg_1765990345.jpg)
