"Azərbaycan" qəzetində dərc olunan "Yolumuz təhlükə saçır" sərlövhəli məqalə barədə 17 noyabr 2025-ci il tarixli məktubunuza Azərbaycan Yerüstü Nəqliyyat Agentliyində (AYNA) baxılmışdır.
Bildiririk ki, məqalədə vurğulanan yol sahəsi üzrə təhlükəsizliyin təmin edilməsi məqsədilə zəruri olan bütün yol nişanları AYNA tərəfindən müvafiq standartlara uyğun şəkildə quraşdırılmışdır.
Nəzərinizə çatdırırıq ki, işıqfor obyektlərinin, o cümlədən sürət rejiminə nəzarət edən xüsusi texniki vasitələrin (radar qurğularının) quraşdırılması, istismarı və idarə edilməsi AYNA-nın səlahiyyətləri xaricindədir.
Anar SƏMƏDOV,
İdarə Heyətinin sədr müavini
Redaksiyadan: Bakı şəhəri Sabunçu rayonu, Yeni Ramana qəsəbəsi, Qarabağ küçəsində yaşayan bir qrup sakin tərəfindən redaksiyamıza göndərilmiş və qəzetimizin 4 noyabr 2025-ci il tarixli sayında "Yolumuz təhlükə saçır" başlığı ilə dərc olunmuş məktuba Azərbaycan Yerüstü Nəqliyyat Agentliyindən (AYNA) verilən bu cavabdan belə məlum olur ki, işıqforların, sürət rejiminə nəzarət edən xüsusi texniki vasitələrin (radar qurğularının) quraşdırılması, istismarı və idarə edilməsi bu qurumun səlahiyyətində deyil.
Məsələ oxucularımıza aydın olsun deyə xatırladaq ki, qeyd edilən ünvanda yaşayan sakinlərin problemi ərazidə avtomobillərin yüksək sürətlə hərəkət etmələri üzündən həyatları üçün yaranan təhlükədir. O üzdən sakinlər illərdir müxtəlif qurumların qapılarını döyürlər ki, ölümsaçan həmin yolun bir tərəfindən digərinə keçmək üçün tədbirlər görülsün. Yəni yola ya işıqfor qoyulsun, ya piyada keçidi üçün zolaq çəkilsin, ya da yolda sürət həddi endirilib kamera quraşdırılsın.
Təəssüf ki, bu günədək həmin qurumların heç biri bu işi, yəni problemin həllini öz üzərinə götürmür, yaxud götürmək istəmir - biri deyir bizlik deyil, başqası deyir vəsaitimiz yoxdur, AYNA da, gördüyünüz kimi, yazır ki, səlahiyyətləri xaricindədir. Şübhə etmirik ki, məsələn, cərimə etmək lazım olsaydı, həmin qurumlar indi əlbəyaxaya çıxmışdılar. Vətəndaşların probleminin həllinə gəldikdə isə hərə bir bəhanə ilə yaxasını kənara çəkir.
Amma bütün hallarda biz və son ümid ünvanı kimi "Azərbaycan" qəzetini seçən sakinlər ümidimizi itirmirik. Təki bu cür problemlərin həllinə cavabdeh olan qurumların rəhbərləri də məsuliyyətlərini itirməsinlər.
