- Qaz sayğacında vəsait olmasına baxmayaraq, qaz təchizatı kəsilib. Məsələ ilə bağlı "Azəriqaz"a, eləcə də digər aidiyyəti qurumlara dəfələrlə rəsmi müraciət etmişəm. Bir müddət sonra mənə bildirildi ki, sayğac nasazdır və dəyişdirilməlidir. Lakin artıq 20 gündən çox vaxt keçməsinə baxmayaraq, nə sayğac dəyişdirilib, nə də qaz verilişi bərpa olunub. Bu halda vətəndaş olaraq hansı hüquqlarım pozulur və "Azəriqaz" bu vəziyyətə görə hüquqi məsuliyyət daşıyırmı?
Mahir MƏHƏRRƏMLİ,
Bakı şəhəri
- Tərəfinizdən verilən sualın cavabı "İstehlakçıların hüquqlarının müdafiəsi haqqında", "Qaz təchizatı haqqında" Azərbaycan Respublikasının qanunları, "Qazdan istifadə Qaydaları"nın təsdiq edilməsi haqqında" Azərbaycan Respublikası Nazirlər Kabinetinin 80 saylı qərarı və Azərbaycan Respublikasının Mülki və İnzibati Xətalar məcəllələri ilə müəyyən olunmuşdur.
"Qaz təchizatı haqqında" qanunun 13-cü maddəsinin 6-cı və 9-cu hissələrinə görə, qaz paylayıcısı (sizin halınızda "Azəriqaz" İB) aşağıdakı hallarda qazın verilməsini dayandıra bilər: istehlakçının müvafiq yazılı müraciəti (qaz təchizatının dayandırılmasının səbəbi və müddəti göstərilməklə) olduqda; təmir-profilaktika və qəza işləri görüldükdə, o cümlədən baş verən yanğının və ya qaz sızmasının qarşısı alındıqda; istehlakçının qaz qurğusu müvafiq icra hakimiyyəti orqanının müəyyən etdiyi dövlət standartlarının tələblərinə cavab vermədikdə; paylayıcının istehlakçıya verdiyi qazın sayğacla müəyyənləşdirilən hesabı istehlakçıya paylayıcı tərəfindən təqdim edildikdən (göndərildikdən) sonra bir ay müddətində tam ödənilmədikdə. Bundan başqa, məişət qaz qurğularını istifadə edən məişət abonentləri üçün qaz sayğacı qaz paylayıcısının vəsaiti hesabına təchiz edilir, quraşdırılır və dəyişdirilir. İstehlakçının təqsiri olmadan zədələnmiş qaz sayğacının təmir olunması, texniki baxışdan keçirilməsi, dəyişdirilməsi (yenisi ilə əvəz edilməsi) və quraşdırılması qaz paylayıcısının vəsaiti hesabına həyata keçirilir. Qaz xətlərinin qanunsuz olaraq kəsilməsi və ya istehlakçıya "Qazdan istifadə Qaydaları"nda nəzərdə tutulmuş hallarda yazılı bildiriş göndərilmədən qazın verilməsinin dayandırılması qadağandır. Bundan əlavə, qazın verilməsinin dayandırılmasına səbəb olmuş hallar aradan qaldırıldıqdan və qaz paylayıcısı tərəfindən istehlakçının iştirakı ilə aktla rəsmiləşdirildikdən sonra 1 gün müddətində qaz paylayıcısı tərəfindən qazın verilməsi bərpa olunmalı və aktın 1 nüsxəsi istehlakçıya təqdim edilməlidir.
Həmçinin nəzərə almaq lazımdır ki, qaz təchizatçısı tərəfindən qazın verilişi istehlakçı üçün xidmətlərin göstərilməsi hesab olunur və "İstehlakçıların hüquqlarının müdafiəsi haqqında" qanunun 19-cu maddəsinə əsasən, əgər qaz təchizatçısı xidmət göstərilməsinə dair müqavilənin icrasına vaxtında başlamırsa və ya çox ləng işləməsi işin vaxtında başa çatmamasına dəlalət edirsə, istehlakçının müqavilədən imtina etmək və itkilərin ödənilməsini tələb etmək hüququ vardır. Dolayısıyla istehlakçı olaraq sizinlə "Azəriqaz" İB arasında olan müqavilə münasibəti mülki xarakterli münasibət olduğundan siz "İstehlakçıların hüquqlarının müdafiəsi haqqında" qanunun 26-cı maddəsinə uyğun olaraq, hüquqlarınızın müdafiəsi ilə bağlı məhkəməyə müraciət edə bilərsiniz. Bu zaman siz iddianıza görə dövlət rüsumu verməkdən azadsınız. Bununla bərabər, siz istehlakçı hüquqlarınızın müdafiəsi məqsədilə Antiinhisar və İstehlak Bazarına Nəzarət Dövlət Agentliyinin "195-1-4" qaynar xəttinə də müraciət edə bilərsiniz. Əgər qaz təchizatçısı tərəfindən agentliyin tələbi yerinə yetirilməsə, İnzibati Xətalar Məcəlləsinin 279.0.7-ci maddəsinə əsasən, qaz təchizatçısını hüquqi şəxs qismində 2500 manatdan 3000 manatadək məbləğində cərimə gözləyir.
Yekun olaraq qeyd olunmalıdır ki, qaz təchizatçısı sayğac nasazdırsa, vaxtında sayğacı dəyişdirərək qazın verilişini bərpa etməli və vurulmuş ziyana görə sizin zərərinizi qarşılamalıdır.
- Qonşuda, demək olar ki, hər gün səs-küydür. Səslərindən gecə belə rahat yatmaq olmur. Deməyin də heç bir faydası yoxdur. Bunun qarşısını almaq üçün kimə və hara müraciət edə bilərik?
Kənan VƏLİYEV,
Hövsan qəsəbəsi
- Azərbaycan Respublikası İnzibati Xətalar Məcəlləsinin 521-ci maddəsinə əsasən, mənzillərdə, yaşayış evlərinin girişlərində və həyətlərində, küçələrdə, istirahət yerlərində və digər ictimai yerlərdə gecə vaxtı saat 00:00-dan 07:00-dək səs-küy salmağa, ucadan mahnı oxumağa, musiqi alətlərini ucadan çalmağa, televizorları, radioqəbulediciləri, maqnitofonları və digər aparatları gur səslə oxutmağa, məişət səs-küyünə qarşı mübarizə tələblərini başqa üsulla pozmağa görə fiziki şəxslər yüz əlli manatdan iki yüz manatadək məbləğdə cərimə edilirlər. Göründüyü kimi, qeyd olunan saatlarda səs-küy salınması qəti qadağandır. İXM-in 521-ci maddəsi ilə inzibati tənbeh tədbiri görmək hüququ ərazi üzrə polis orqanına məxsusdur. Bu halda siz polis çağıraraq səs-küy barədə məlumat verə bilərsiniz. Polis əməkdaşları hadisəni yerində yoxlayıb pozuntuya yol vermiş şəxs barəsində intizam tənbeh tədbiri görə bilər.
Sutkanın digər saatları ilə bağlı qeyd olunmalıdır ki, Azərbaycan Respublikası Mülki Məcəlləsinin 171-ci maddəsinə görə, daşınmaz əmlakın mülkiyyətçisi, əgər öz sahəsindən istifadə etməkdə ona maneçilik yaranmırsa və ya hüququ əhəmiyyətsiz dərəcədə pozulursa, qonşu sahədən səs-küyün və ya digər oxşar amillərin öz sahəsinə təsirini qadağan edə bilməz. Yəni sizin qonşu təsirinə dözmək vəzifəniz var.
Bununla belə, əgər həmin səslər sizi ciddi surətdə narahat edirsə, cavabdehin yaşayış yeri üzrə məhkəməyə müraciət edə bilərsiniz. Bu zaman məhkəməyə müraciət edərək qonşuların qanunsuz davranışlarına (səs-küyə və s.) son qoyulması və dəyən mənəvi ziyanın ödənilməsi ilə bağlı iddia qaldıra və sübut qismində polisin protokolunu, audioyazıları və şahid ifadələrini təqdim edə bilərsiniz.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
