- Daimi qeydiyyatım başqa ünvandadır, lakin hazırda qohum evində yaşayıram. Bu yaxınlarda sahə müvəkkili bildirdi ki, bir həftə ərzində mütləq həmin ünvanda qeydiyyata düşməliyəm, əks halda cərimə olunacağam. Xahiş edirəm izah edəsiniz, nə üçün müvəqqəti yaşadığım ünvanda qeydiyyata düşməliyəm? Sahə müvəkkilinin bu tələbi qanunvericiliyə uyğundurmu?
Yeganə XUDİYEVA,
Bakı şəhəri
- Sualınıza cavab olaraq bildiririk ki, "Yaşayış yeri və olduğu yer üzrə qeydiyyat haqqında" Azərbaycan Respublikası Qanununun 10-cu maddəsinə, habelə "Yaşayış yeri və olduğu yer üzrə qeydiyyat haqqında" Azərbaycan Respublikası Qanununun tətbiqi haqqında Əsasnamənin 11-ci bəndinə əsasən, vətəndaşın olduğu yer üzrə qeydiyyatı yaşayış yeri üzrə qeydiyyatdan çıxarılmadan aparılır. "Şəxsin olduğu yer" dedikdə həmçinin şəxsin müvəqqəti yaşadığı yaşayış binası (özünün, qohumunun, tanışının və b.) mənzili də başa düşülməlidir. Yaşayış yerindən kənarda 60 gündən artıq müvəqqəti yaşamaq istəyən vətəndaş həmin yerə gəldikdən sonra 7 gün ərzində (istirahət, səsvermə, iş günü hesab edilməyən bayram günləri və ümumxalq hüzn günü istisna olmaqla) ərizə-anket dolduraraq müvafiq dövlət orqanına təqdim etməlidir. Həmin orqan vətəndaşı dərhal olduğu yer üzrə qeydiyyata almalıdır. Əlavə olaraq qeyd olunmalıdır ki, vətəndaşlar rəsmi dövlət mobil portalı olan "E-polis" proqram təminatı vasitəsilə də olduğu yer üzrə qeydiyyata düşə bilər.
Sahə müvəkkilinin tələbinin qanuniliyi sualına gəldikdə isə, konkret cavab budur ki, bəli, bu tələb qanunidir. Qeyd olunmalıdır ki, əslində, asayişin və təhlükəsizliyin təmin edilməsi baxımından dövlətin qanunla belə tələb müəyyən etməsi hüquqi cəhətdən əsaslı olmaqla insanların sərbəst hərəkət hüququnu məhdudlaşdırmır. Bu halda vətəndaş həmin yerdə yaşamaq üçün polis orqanından icazə almır, sadəcə polis orqanını müvəqqət yaşayış yeri barədə məlumatlandırır. Beləliklə, əgər siz 60 gündən artıq müddətə müvəqqəti olaraq daimi qeydiyyat ünvanından kənarda yaşayırsınızsa və yuxarıda göstərilən qaydada qeydiyyata düşməmisinizsə, Azərbaycan Respublikası İnzibati Xətalar Məcəlləsinin 563-cü maddəsi ilə yaşayış yeri və olduğu yer üzrə qeydiyyatdan keçməməyinizə, yaxud qeydiyyata alma və qeydiyyatdan çıxma qaydalarına əməl etməməyinizə görə sizə xəbərdarlıq edilə və ya 30 (otuz) manat məbləğində cərimə yazıla bilər.
- İnternetin sürəti çox zəifdir. Son model modemlə əvəz etsək də, heç bir dəyişiklik olmadı. Dəfələrlə zəng vurduq, rəsmi müraciətlər etdik, lakin nəticə vermədi. Bilmək istəyirəm: istifadəçi olaraq haqqımızı qorumaq üçün hansı əlavə hüquqi yollar mövcuddur?
Aliyə İSKƏNDƏRLİ,
Bakı şəhəri
- İnternet provayderi ilə aranızda olan münasibət çərçivəsində sizin hüquqlarınızın pozulması (xidmətgöstərən tərəfindən müqavilə şərtlərinə uyğun olmayan xidmətlərin göstərilməsi) ilə bağlı münasibətlər "İstehlakçıların hüquqlarının müdafiəsi haqqında" Azərbaycan Respublikasının Qanunu ilə tənzimlənir. Həmin qanunun 5-ci maddəsinə əsasən, siz istehlakçı hesab olunursunuz və xidmət icraçısından göstərilmiş xidmətin keyfiyyətinin normativ sənədlərə, müqavilə şərtlərinə uyğun gəlməsini və həmçinin xidmət haqqında icraçının təqdim etdiyi məlumata cavab verməsini tələb etmək hüququna maliksiniz. İcraçı istehlakçıya keyfiyyəti normativ sənədlərə, müqavilə şərtlərinə və xidmət haqqında icraçının təqdim etdiyi məlumata uyğun olan mal verməlidir. Adıçəkilən qanunun 9-cu maddəsinə görə, xidmətlərdə müqavilə şərtlərindən əhəmiyyətli dərəcədə kənara çıxıldıqda, yaxud başqa mühüm qüsurlar olduqda istehlakçı həmin qüsurları aradan qaldırmaq üçün icraçıya əlavə vaxt verərsə və həmin müddətdə də xidmət yerinə yetirilməzsə, müqavilənin ləğv olunmasını və itkilərin ödənilməsini tələb etmək və ya icraçının hesabına qüsurların aradan qaldırılmasını üçüncü şəxslərə tapşırmaq hüququndan yararlana bilər. İcraçı müqavilənin şərtlərindən kənara çıxaraq, xidməti pisləşdiribsə, yaxud xidmətdə başqa qüsurlara yol veribsə, istehlakçının istəyinə uyğun olaraq, göstərilən qüsurların icraçının hesabına əvəzsiz olaraq müvafiq müddətdə aradan qaldırılmasını və ya xidmətin qüsurlarını öz vəsaitləri ilə aradan qaldırarkən çəkdiyi zəruri xərclərin ödənilməsini, yaxud işin, xidmətin haqqının müvafiq surətdə azaldılmasını tələb edə bilər.
Beləliklə, siz internet provayderi ilə bağlanmış müqavilədə konkret sürət və xidmət keyfiyyəti qeyd olunubsa və bu şərtlər yerinə yetirilmirsə, müqavilənin öhdəliyinin pozulması faktı əsasında internet provayderinə yazılı şikayət ünvanlaya bilərsiniz. Əgər internet provayderi müvafiq bərpaedici işlər görməzsə, bu, məhkəmədə (hüquqi şəxsin ünvanının olduğu yerin məhkəməsində) iddia qaldırmaq üçün əsas ola bilər. Bundan əlavə, tələbiniz internet provayderi tərəfindən yerinə yetirilməzsə, bu zaman siz Antiinhisar və İstehlak Bazarına Nəzarət Dövlət Agentliyinin "195-1-4" qaynar xəttinə müraciət edə bilərsiniz. Agentliyin ixtisaslaşdırılmış strukturları bu məsələdə sizə zəruri kömək göstərəcəkdir. Əlavə olaraq internet xidmətlərinə nəzarət edən qurumlardan biri də Rəqəmsal İnkişaf və Nəqliyyat Nazirliyidir. Siz nazirliyə rəsmi məktub və ya elektron şikayət formasında müraciət göndərərək internet provayderin texniki göstəricilər üzrə öhdəliklərini yerinə yetirmədiyini və dəfələrlə edilən müraciətlərinizin nəticə vermədiyini qeyd edə bilərsiniz.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
