Şuşa şəhərində keçirilən Azərbaycan-Latviya iqtisadi, elmi-texniki və mədəni əməkdaşlıq üzrə birgə Hökumətlərarası Komissiyanın 9-cu iclası iki ölkə arasında gələcək əməkdaşlıq baxımından çox vacibdir. Əsas əhəmiyyəti isə yeni əməkdaşlıq sahələrinin müəyyənləşdirilməsidir. İlk növbədə, kənd təsərrüfatı sahəsində əməkdaşlıq məsələləri müzakirə olundu.
AZƏRTAC-ın bölgə müxbiri xəbər verir ki, bunu Şuşada jurnalistlərə müsahibəsində Latviyanın kənd təsərrüfatı naziri, Azərbaycan-Latviya iqtisadi əməkdaşlıq üzrə birgə Hökumətlərarası Komissiyanın Latviya tərəfindən həmsədri Armands Krauze deyib.
Xüsusilə heyvandarlıq sahəsində birgə fəaliyyət imkanlarının nəzərdən keçirildiyini deyən Latviyanın kənd təsərrüfatı naziri bildirib ki, yüksəkkeyfiyyətli cins heyvanların, süd və ətlik mal-qaranın Baltikyanı ölkələrdən, o cümlədən Latviyadan Azərbaycana gətirilməsi mümkündür. Regionda ən qabaqcıl hərrac mərkəzi fəaliyyət göstərir və bu mərkəzdə ildə təxminən 30 min baş heyvan satılır. Satışın böyük hissəsi Türkiyəyə ixrac olunur. Bu baxımdan Azərbaycana cins heyvanların tədarükü ilə bağlı heç bir çətinlik gözlənilmir.
Armands Krauze qeyd edib ki, kənd təsərrüfatında digər mühüm istiqamət meşəçilik sahəsidir: “İqlim dəyişikliyinin təsirlərinin azaldılması və meşələrin bərpası bu gün bütün ölkələr üçün prioritetdir. Məlum olduğu kimi, xüsusilə bu regionda işğal dövründə meşə sahələrinin əhəmiyyətli hissəsi məhv edilib və onların bərpasına ciddi ehtiyac var. Bu sahədə “Nordik texnologiyaları”nın tətbiqi imkanları nəzərdən keçirildi. Sözügedən texnologiyalar meşələrin daha sürətli və daha səmərəli şəkildə bərpasına imkan yarada bilər”.
İclasda nəqliyyat, logistika və maliyyə sahələrində əməkdaşlıq perspektivlərinin də müzakirə olunduğunu deyən nazir bildirib ki, Latviya İqtisadiyyat Nazirliyinin dövlət katibi tərəfindən bu istiqamətlər üzrə təqdimat keçirilib və konkret əməkdaşlıq imkanları diqqətə çatdırılıb.
“Görüş çərçivəsində film sənayesi sahəsində əməkdaşlıq ideyası da irəli sürüldü. Latviyada “Brilyant əl” filminin Bakıda çəkilmiş məşhur səhnəsi çox tanınır. Ümumilikdə, bu sahədə qarşılıqlı əməkdaşlığın genişləndirilməsi, ölkələrimizin və paytaxtlarımızın film çəkilişləri üçün cəlbedici məkan kimi təşviqi yaxşı perspektiv kimi qiymətləndirilir. Riqa bu istiqamətdə artıq müəyyən addımlar atmaqdadır”, – deyə Armands Krauze bildirib.
jpeg_1776269390.jpeg)
jpg_1775472819.jpg)
