Aprelin 15-də Yeni Azərbaycan Partiyası (YAP) Veteranlar Şurasının və YAP Suraxanı rayon təşkilatının birgə təşkilatçılığı ilə “Azərbaycanda dövlət siyasətinin ideoloji əsasları: gələcəyə baxış” mövzusunda tədbir keçirilib.
Partiyadan AZƏRTAC-a bildirilib ki, əvvəlcə Ulu Öndər Heydər Əliyevin büstü ziyarət olunub, önünə gül dəstələri düzülüb.
Tədbirdə Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib, Dövlət Himni səsləndirilib.
Sonra YAP Suraxanı rayon təşkilatının sədri Vüqar Seyidov, YAP İdarə Heyətinin üzvü, partiyanın Veteranlar Şurasının sədri Arif Rəhimzadə, YAP İdarə Heyətinin üzvü, Milli Məclisin deputatı Mübariz Qurbanlı, YAP Veteranlar Şurasının üzvü Fidumə Hüseynova, Milli Məclisin deputatı Sevinc Fətəliyeva və YAP Suraxanı rayon təşkilatının gənc üzvü Şahnaz Heybətova çıxış ediblər.
Çıxışlarda bildirilib ki, Azərbaycan Konstitusiyası dövlətçilik ideologiyasının əsasını təşkil edir, müasir ideoloji xətt isə Ümummilli Lider Heydər Əliyevin siyasi irsinə və Prezident İlham Əliyevin davam etdirdiyi strateji kursa söykənir. Bu kurs suverenliyin möhkəmləndirilməsi, innovativ inkişaf və milli maraqların təmin olunmasını prioritet kimi müəyyənləşdirir.
Vurğulanıb ki, Azərbaycan ərazi bütövlüyünü bərpa etməklə regionda yeni reallıqlar yaradıb. Hazırda işğaldan azad olunmuş ərazilərdə bərpa-quruculuq işləri və “Böyük Qayıdış” Proqramı uğurla icra olunur. Güclü ideoloji əsaslara söykənən dövlət siyasətinin gələcək uğurların təminatçısı olduğu, Yeni Azərbaycan Partiyasının da bu istiqamətdə fəal rol oynadığı qeyd edilib.
Tədbir interaktiv formada davam edib, iştirakçıların sualları cavablandırılıb.
Daha sonra Suraxanı rayonunun ictimai-siyasi həyatında fərqlənən bir qrup şəxsə Fəxri fərman və hədiyyələr, YAP sıralarına yeni qəbul olunmuş üzvlərə isə partiya vəsiqələri təqdim edilib.
jpg_1779707872.jpg)
