Albert zirvəsi

- Adın nədir?

- Albert.

- Hansı millətin nümayəndəsisən?

- Yəhudi.

- Yəhudiləri Azərbaycan torpağını qorumağa nə məcbur edir?

- Mən bu torpaqda yaşayıram. Doğulmuşam burada, yaşayıram  burada...

Bu sətirlərin müəllifi tolerantlıq anlayışının haqqını verən, qardaşlığın, candaşlığın qanla, soyla olmadığının sübutu, Birinci Qarabağ müharibəsində tank döyüşündə yaratdığı "yəhudi buterbrodu" taktikası ilə düşməni darmadağın edən Albert Aqarunovdur...

Albert Aqarunov 1969-cu il aprelin 25-də Bakının Əmircan qəsəbəsində yəhudi ailəsində dünyaya gəlib. Suraxanı rayonundakı 154 saylı məktəbin səkkizinci sinfini bitirdikdən sonra peşə məktəbində oxuyub,  sürücü-mexanik ixtisasına yiyələnib. Hərbi xidmətə gedənə qədər çətin maddi durumda yaşayan ailəsinə kömək etmək üçün işləyib. 1987-ci ildə Aqarunov hərbi xidmətə çağırılıb, Gürcüstanda xidmət edib, tank komandiri olub. 1989-cu ildə ordu sıralarından tərxis olunaraq Bakıya dönüb. Bundan sonra Suraxanıda maşınqayırma zavodunda işləyib.

Birinci Qarabağ müharibəsi başlayanda Albert evə gələrək cəbhəyə könüllü yazıldığını ailəsinə bildirib. Bu xəbər gözlənilməz olsa da, ailəsi onun cəbhəyə getmək fikri ilə razılaşıb.

Tank komandiri təyin edilən Albert Aqarunov Şuşada xüsusi təyinatlı taborda döyüşüb. O, Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini, zirehli texnikasını məhv edib. Hətta düşmənin iki tankı bir-birinə yaxınlaşan zaman bir mərmi ilə onları birdəfəyə vurub. Sonralar bu metod döyüş yoldaşları tərəfindən "yəhudi buterbrodu" adını almışdı. Ermənilər onun başına 5 milyon rubl mükafat qoymuşdular.

1992-ci il mayın 8-də Şuşaya ilk girməyə cəhd edən düşmən tankına flaqman kimi "fəxri" erməni bayrağı verilibmiş. Avşaryanın 442 nömrəli tankının  qarşısına Albertin idarə etdiyi 533 nömrəli tank çıxıb. Düşmən ekipajı - komandir Q.Avşaryan, sürücü-mexanik A.Avanesyan, atıcı-artilleriyaçı Ş.Sarkisyan elə ilk atəşdən tankın kabinəsində məhv ediliblər. Sonralar ermənilər Avşaryanın yanmış T-72 tankını bərpa edərək tünd-yaşıl rəngə boyayıb, təpənin başında Şuşaya tuşlanmış vəziyyətdə qoymuşdular. Onu da Vətən müharibəsinin cəngavərləri darmadağın etdilər...

Albert Aqarunov 1992-ci il mayın 8-də tankının önündəki şəhid əsgər yoldaşının cəsədini kənara çəkmək üçün hərbi maşından çıxarkən snayper gülləsindən həlak olur. Şəhidlik zirvəsinə ucalan Albert Bakıda Şəhidlər xiyabanında dəfn edilib.

Azərbaycanın yəhudi balasının ölümündən 30 il ötür. Birinci Qarabağ müharibəsində vətəni Azərbaycan uğrunda həyatını qurban verən Albert Aqarunovun əziz xatirəsini xalqımız daim əziz tutur, onun adını əbədiləşdirir. Ölümündən sonra Azərbaycanın Milli Qəhrəmanı adına layiq görülən Albert Aqarunovun Bakıda təhsil aldığı 154 nömrəli məktəb onun adını daşıyır. Məktəbin önündə büstü qoyulub. Nərimanov rayonunda adına küçə var. 2017-ci ildə Əmircan qəsəbəsində doğulub boya-başa çatdığı binaya xatirə lövhəsi vurulub. Həmçinin 2019-cu ildə Bakının Nərimanov rayonunda heykəli ucaldılıb.

İndi Şuşada ulduzlar daha işıqlı, daha parlaqdır. İndi Qarabağ daha, hətta bu yaralı görünüşüylə belə daha gözəl görünür. İndi Albertin də ruhu rahatdır. Çünki uğrunda şəhid olduğu Şuşa da azaddır. Həm də bütün şəhidlərimizin qisası artıqlaması ilə alınıb. Hərb tariximizin ən parlaq salnamələrindən olan Vətən müharibəsindəki tarixi Zəfərimiz müqəddəs şəhid ruhlarına da ehtiramın, sevgi və şükranlığın ən gözəl nümunəsidir.

Ülkər XASPOLADOVA,

İlham BABAYEV (foto),

"Azərbaycan"