“Akkord” korporasiyası “Sənaye ili” çərçivəsində yeni istehsalat obyektlərinin işə salınmasını davam etdirir.
“Akkord”un mətbuat xidmətindən AzərTAc-a bildiriblər ki, korporasiya Balaxanı qəsəbəsində inşa etdiyi müasir və yüksək istehsal həcminə malik yeni asfalt zavodunu istismara verib.
Açılış mərasimində korporasiyanın baş direktoru Göksəl Aybek saatda 240 ton istehsal həcminə malik bu zavodun ən müasir standartlara uyğun qurulduğunu və həm yüksək keyfiyyətli məhsul istehsalı, həm də yeni iş yerlərinin yaradılması baxımından əhəmiyyətini vurğulayıb. Baş direktor bildirib ki, ərazidə əvvəldən mövcud olan “Kreqmaş” asfalt zavodu ilə birlikdə yeni zavodun saatda istehsal həcmi 360 ton olacaq. Bu isə Abşeron yarımadasının yol infrastrukturunun yenidən qurulmasında mühüm əhəmiyyət daşıyacaq.
Tədbirdə Sabunçu Rayon İcra Hakimiyyətinin başçısı Adil Vəliyev çıxış edərək korporasiya ilə rəhbərlik etdiyi rayonun çox sıx tellərlə bir-birinə bağlı olduğunu, hətta şirkətin ilk istehsal müəssisələrindən olan “Akkord” beton zavodunun bu rayonda istehsala başladığını vurğulayıb. A.Vəliyev korporasiyanın rayonun sosial layihələrində yaxından iştirakını xüsusi qeyd edib.
Tədbirdə, həmçinin Azərbaycan Respublikası Sahibkarlar (İşəgötürənlər) Konfederasiyasının sədri Məmməd Musayev çıxış edərək yeni zavodun əhəmiyyətindən danışıb.
Bildirilib ki, bu zavodun istismara verilməsi “Akkord”un istehsal fəaliyyətinin artırılması siyasətinə uyğun olaraq həyata keçirilib. Hazırda istifadəyə verilən zavod “Akkord”un 5-ci asfalt zavodudur. Ümumilikdə beş asfalt zavodunun illik istehsal gücü 1 milyon 635 min 840 tondur.
Yaxın vaxtlarda korporasiya “Sənaye ili” çərçivəsində fibrobeton, metal-konstruksiya məhsulları, həmçinin şüşə fasadların yüksək texnologiyalarla istehsalı müəssisələrinin inşasını həyata keçirəcək.
jpg_1765800994.jpg)
jpg_1765800788.jpg)
