ADA Universitetinin İxtisasartırma Proqramının ənənəvi olaraq hər il təşkil etdiyi "Xəzər hövzəsi araşdırmaları" proqramı fevralın 27-si başa çatıb.
Universitetdən AZƏRTAC-a bildirilib ki, bu münasibətlə keçirilən “Məzun günü”ndə 19 ölkəni təmsil edən və Azərbaycanda yeni fəaliyyətə başlayan diplomatlara sertifikatları təqdim olunub.
Proqramın fevralın 17-də baş tutan açılış mərasimində çıxış edən ADA Universitetinin akademik işlər üzrə prorektoru Elkin Nurməmmədov və onun müşaviri, İxtisasartırma Proqramının rəhbəri Aygün Hacıyeva universitetin yeni ixtisaslarından, nailiyyətlərindən, ümumilikdə Azərbaycan Diplomatik Akademiyasından ADA Universitetinə qədər olan inkişaf yolundan bəhs ediblər.
Onlar "Xəzər hövzəsi araşdırmaları" proqramının yeni mərhələsini təqdim edərkən bildiriblər ki, məqsəd Azərbaycanda akkreditə olunmuş diplomatik korpusun nümayəndələrini regional yeniliklər barədə məlumatlandırmaq, onların bölgə ilə bağlı biliklərini dərinləşdirmək və ölkəmizi tanıtmaqdır. Əlavə edilib ki, ildə bir neçə dəfə keçirilən proqramda indiyədək 108 ölkədən 500-dək diplomat iştirak edib.
Proqramın son günü Azərbaycan Respublikası Prezidentinin Xüsusi Tapşırıqlar üzrə nümayəndəsi səfir Elçin Əmirbəyovun "Azad olunmuş Qarabağın bərpası və regionda sülh quruculuğu prosesi" mövzusunda dəyirmi masa müzakirəsi ilə yekunlaşıb. Çıxışçı regional sabitlik və təhlükəsizliyə, habelə davamlı sülhə nail olmaq üçün aparılan danışıqlar prosesindən və atılan addımlardan bəhs edib, iştirakçıların çoxsaylı suallarını cavablandırıb.
Proqramla bağlı təəssüratlarını bölüşən diplomatlar bildiriblər ki, ADA Universitetinin professor heyəti, Xarici İşlər Nazirliyi, Qaçqınların və Məcburi Köçkünlərin İşləri üzrə Dövlət Komitəsinin yüksək vəzifəli nümayəndələri, eləcə də yerli beyin mərkəzinin, SOFAZ və BP kimi qurumların ekspertləri tərəfindən keçirilən sessiyalar onlara Azərbaycanı daha yaxından tanımağa fürsət verib.
"Xəzər hövzəsi araşdırmaları" proqramı ərzində iştirakçılar fərqli mövzularda interaktiv müzakirələrdə iştirak ediblər, ölkəmizlə bağlı strateji məsələlər üzrə çıxışları dinləyiblər, fikir mübadiləsi aparıblar.
Xəzər hövzəsi ölkələrindən, xüsusilə Qazaxıstan və Türkmənistandan olan diplomatlar bu regionu təmsil edən diplomat qismində öz fikirlərini bölüşüblər.
Həmçinin ABŞ, Meksika, Kolumbiya, Almaniya, Niderland, Macarıstan, Koreya, Türkiyə, İordaniya və İsrail kimi fərqli regionlardan olan ölkələri təmsil edən diplomatlar da proqram ərzində öz yanaşmalarını, təcrübələrini bölüşüblər.
