ABŞ Ticarət və İnkişaf Agentliyinin (USTDA) regional direktoru Karl Kressin rəhbərlik etdiyi nümayəndə heyətinin Azərbaycana səfəri Bakı-Vaşinqton münasibətlərində yeni mərhələnin konturlarını aydın şəkildə ortaya qoyur. Bu səfər təkcə texniki əməkdaşlıq çərçivəsində keçirilən görüşlər toplusu deyil, həm də ABŞ–Azərbaycan strateji tərəfdaşlığının dərinləşdirilməsi baxımından mühüm siyasi və iqtisadi mesajlar ehtiva edir.
Bu sözləri AZƏRTAC-a açıqlamasında beynəlxalq münasibətlər üzrə amerikalı ekspert Peter Tase söyləyib.
O bildirib ki, səfər zamanı aparılan müzakirələrin mərkəzində ticarət, sənaye və regional iqtisadi layihələrin olması tərəflərin münasibətləri daha praktik və nəticəyönümlü müstəviyə keçirmək niyyətindən xəbər verir. Xüsusilə dəmir yolu infrastrukturu, telekommunikasiya, kosmik texnologiyalar və süni intellekt tətbiqləri üçün məlumat mərkəzlərinin inşası ilə bağlı müzakirələr Azərbaycanın gələcək inkişaf prioritetlərinin ABŞ-ın texnoloji və maliyyə imkanları ilə uzlaşdırıldığını göstərir. Bu, əməkdaşlığın artıq klassik enerji tərəfdaşlığı çərçivəsindən çıxaraq rəqəmsal və innovativ sahələrə keçdiyini təsdiqləyir.
“Diqqətçəkən məqamlardan biri də bu əməkdaşlığın siyasi əsaslarının möhkəm institusional baza üzərində qurulmasıdır. Belə ki, 2025-ci il avqustun 8-də Azərbaycan və ABŞ prezidentlərinin Ağ Evdə keçirilən görüşü iki ölkə arasında strateji tərəfdaşlığın yeni sütunlarını formalaşdırıb. ABŞ nümayəndə heyətinin Bakıdakı görüşləri də həmin razılaşmaların praktik müstəvidə icrasına yönəlmiş addım kimi dəyərləndirilə bilər. Görüşlərdə TRIPP marşrutunun xüsusi vurğulanması ABŞ-ın regional bağlantılara və alternativ nəqliyyat dəhlizlərinə artan marağının göstəricisidir. Orta Dəhlizin genişlənməsi, enerji və logistika marşrutlarının şaxələndirilməsi fonunda Azərbaycan Avrasiyanın əsas tranzit və enerji mərkəzlərindən biri kimi ön plana çıxır. Bu reallıq Bakının regional diplomatiyasını və iqtisadi siyasətini daha da əhəmiyyətli edir”,- deyə P.Tase vurğulayıb.
Ekspert əlavə edib ki, ABŞ-ın özəl sektorunun Azərbaycan bazarına marağının artması strateji tərəfdaşlığın iqtisadi dayaqlarını gücləndirir. İnfrastruktur, logistika və bərpaolunan enerji sahələrinə mümkün investisiyalar təkcə iqtisadi fayda deyil, həm də uzunmüddətli siyasi etimadın göstəricisi kimi qiymətləndirilə bilər. Azərbaycanın geosiyasi mövqeyi, enerji təhlükəsizliyindəki rolu və regional iqtisadi təşəbbüslərdə artan çəkisi fonunda Vaşinqton üçün etibarlı tərəfdaş kimi çıxış etməsi bu əməkdaşlığın gələcəkdə daha da dərinləşəcəyinə əsas verir.
