Azərbaycan-ABŞ münasibətlərinin inkişafı və Cənubi Qafqazda yeni geosiyasi reallıqlar fonunda 907-ci düzəlişin tam ləğvi məsələsi yenidən aktuallaşıb. Uzun illərdir müzakirə mövzusu olan bu məhdudiyyət regionda yaranan yeni reallıqlar və strateji tərəfdaşlıq prinsipləri ilə artıq uzlaşmır.
Milli Məclisin deputatı Nigar Məmmədova qəzetimizə açıqlamasında bildirib ki, 907-ci düzəliş ABŞ-nin Azərbaycana birbaşa dövlət yardımını məhdudlaşdırmaq məqsədilə qəbul edilib və həmin dövrdə regionda davam edən münaqişə və qeyri-sabitlik şəraiti bu qərarın əsaslandırılması kimi təqdim olunurdu: "Amma bu iddiaların heç bir məntiqi əsası yox idi. 2020-ci il 44 günlük Vətən müharibəsindən sonra Cənubi Qafqazda siyasi və hərbi vəziyyət əsaslı şəkildə dəyişib. Azərbaycan ərazi bütövlüyünü bərpa edib, regionda yeni əməkdaşlıq platformaları formalaşıb və nəqliyyat-kommunikasiya xətləri üzrə perspektivlər genişlənib. Bu kontekstdə 907-ci düzəlişin qüvvədə saxlanması ikitərəfli münasibətlərin ruhuna uyğun gəlmir".
Deputat xatırladıb ki, 907-ci düzəlişin icrasının dayandırılması ölkəmiz üçün ən böyük siyasi uğurlardan biridir. Azərbaycan hər zaman bu sənədi çox böyük ədalətsizlik hesab edib. İşğala və etnik təmizləməyə məruz qalan ölkəyə qarşı belə bir qərəzli addımın atılması yolverilməz idi. Ermənistana qarşı hər hansı blokadadan söhbət getmədiyi halda, ölkəmizə qarşı belə bir qərəzli yanaşma sərgilənmişdi. Prezident İlham Əliyev dəfələrlə Azərbaycana hər zaman ehtiyac olacağını ovaxtkı administrasiyanın yüksəkvəzifəli şəxslərinə çatdırmışdı.
N.Məmmədova deyib ki, bu gün Azərbaycan kifayət qədər etibarlı və vacib tərəfdaşdır: "Blokada" iddiasına gəlincə, cənab Prezidentin də söylədiyi kimi, nə o vaxt blokada var idi, nə də bu gün. "Bu gün Azərbaycan ərazisindən Ermənistana müxtəlif yerlərdən yüklər gedir, yollar açıqdır və hətta Azərbaycanın neft məhsulları Ermənistana ixrac edilir. Hansı blokadadan söhbət gedə bilər?! Əgər 907-ci düzəlişin formal səbəbi blokada idisə, bu, hazırda yoxdur", - deyə deputat bildirib.
O qeyd edib ki, rəsmi Bakı Konqres tərəfindən bu absurd düzəlişin tamamilə aradan qaldırılmasını gözləyir. Bu addım həm də ABŞ-nin regional siyasətdə daha çevik hərəkət etməsinə imkan yaradacaq. ABŞ-də də praqmatik siyasətçilər hesab edirlər ki, hazırkı məhdudiyyətlər mövcud reallıqlara uyğun deyil və tərəfdaşlıq əlaqələrinə əngəl törədir. Azərbaycanın enerji təhlükəsizliyi, regional stabillik və antiterror sahəsində ABŞ üçün strateji tərəfdaş olması nəzərə alınarsa, 907-ci düzəlişin saxlanması məqsədəuyğun deyil.
Əsmər QARDAŞXANOVA,
"Azərbaycan"
19 (1)jpg_1771885865.jpg)
